ଡେସ୍କ: ଉତ୍ତର ପଶ୍ଚିମ ଦିଲ୍ଲୀର ଶକୁର ବସ୍ତିରେ ମହିଳାଙ୍କୁ ଛୁରାମାଡ଼ ହେବାର ୪ ଦିନ ପରେ ପୁଲିସ ୨୧ ବର୍ଷୀୟ ଯୁବକକୁ ଗିରଫ କରିଛି। ପୁରୁଷ ଜଣକ କହିଛନ୍ତି ଯେ ପୂର୍ବରୁ ସେହି ମହିଳାଙ୍କ ସହ ତାଙ୍କର ବନ୍ଧୁତା ଥିଲା, କିନ୍ତୁ ପରେ ସେ ତାଙ୍କୁ ଅଣଦେଖା କରିବା ଆରମ୍ଭ କରିଥିଲେ। ଶେଷ ଥର ପାଇଁ ଦେଖା କରିବା ବାହାନା କରି ସେ ତାଙ୍କୁ ଏକ ନିଛାଟିଆ ଅଞ୍ଚଳକୁ ଡାକି ପ୍ରାୟ ୫୦ ଥର ଛୁରୀ ଭୁସି ହତ୍ୟା କରିଥିଲେ। ଜଣେ ପୁଲିସ ଅଧିକାରୀ କହିଛନ୍ତି ଯେ ଜାନୁଆରୀ ୨୫ ତାରିଖ ରାତି ୧.୩୦ ମିନିଟ ସମୟରେ ଶକୁର ବସ୍ତିରେ ରେଲୱେ ଟ୍ରାକ ନିକଟରେ ମୃତଦେହ ପଡ଼ିଥିବା ଦେଖିବାକୁ ମିଳିଥିଲା।
୧୦୦ ଘଣ୍ଟାର ସିସି ଟିଭି ଫୁଟେଜ୍ ସମୀକ୍ଷା କରିବା ଏବଂ ପୁଙ୍ଖାନୁପୁଙ୍ଖ ଅନୁସନ୍ଧାନ କରିବା ପରେ ପୁଲିସ ଅଭିଯୁକ୍ତକୁ ଚିହ୍ନଟ କରିଥିଲା। ସେ ଅପରାଧ କରିଥିବା ସ୍ୱୀକାର କରିଛି। ଅଭିଯୁକ୍ତ ବୁଦ୍ଧ ବିହାରର ବାସିନ୍ଦା ପାଣ୍ଡବ କୁମାର (୨୧) ବୋଲି ଜଣାପଡିଛି। ସେ ଜଣେ ଶ୍ରମିକ ଭାବରେ କାର୍ଯ୍ୟ କରେ। ଜଣେ ଅଧିକାରୀ କହିଛନ୍ତି, କୁମାରକୁ ବୁଦ୍ଧ ବିହାରରୁ ଗିରଫ କରାଯାଇଛି।
ଡିସିପି ଜିମି ଚିରାମ କହିଛନ୍ତି ଯେ ଅଭିଯୁକ୍ତ ଗତ ଦେଢ଼ ବର୍ଷ ଧରି ମହିଳାଙ୍କ ସହ ବନ୍ଧୁତା କରିଥିଲେ। ତାଙ୍କ ବଡ଼ ଭଉଣୀ ସେଠାରେ ବିବାହିତ ଥିବାରୁ ସେ ତାଙ୍କୁ ବିହାରର ନିଜ ଗାଁରେ ଭେଟିଥିଲେ। କିଛିଦିନ ହେବ ଅଭିଯୁକ୍ତ ସନ୍ଦେହ କରୁଥିଲା ଯେ ସମ୍ପୃକ୍ତ ମହିଳାଙ୍କର ଏକାଧିକ ଲୋକଙ୍କ ସହ ସମ୍ପର୍କ ରହିଛି ଓ ସେ ତାଙ୍କୁ ଅଣଦେଖା କରୁଛି। ତେଣୁ ସେ ତାଙ୍କୁ ହତ୍ୟା କରିବାକୁ ନିଷ୍ପତ୍ତି ନେଇଥିଲା।
