ଦୁବାଇ : ଚଳିତ ଆଇପିଏଲ୍ର ୩୮ତମ ମୁକାବିଲାରେ ଦିଲ୍ଲୀ କ୍ୟାପିଟାଲ୍ସ ଓ କିଙ୍ଗସ ଏକାଦଶ ପଞ୍ଜାବ ମଧ୍ୟରେ ଖେଳାଯାଉଛି । ପଏଣ୍ଟ ଟେବୁଲର ସବୁଠାରୁ ଉପରେ ଥିବା ଦିଲ୍ଲୀ କ୍ୟାପିଟାଲ୍ସର ଅଧିନାୟକ ଶ୍ରେୟସ ଆୟର ଆଜି ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲେ । ତେବେ ବ୍ୟାଟିଂ ପାଇଁ ପଡିଆକୁ ଓହ୍ଲାଇଥିବା ଦିଲ୍ଲୀ କ୍ୟାପିଟାଲ୍ସ ୨୦ ଓଭରର ଖେଳ ଖେଳି ୫ ୱିକେଟ ହରାଇ ୧୬୪ ରନ ସଂଗ୍ରହ କରିଛି। ଦଳର ଇନଫର୍ମ ବ୍ୟାଟ୍ସମ୍ୟାନ ଶିଖର ଧାୱନ ଲଗାତର ଦ୍ବିତୀୟ ଥର ଚଳିତ ଆଇପିଏଲରେ ଶତକ ହାସଲ କରିଛନ୍ତି। ଧାୱନ ୬୧ ବଲରୁ ୧୨ ଚୌକା ଓ ୩ ଛକା ସହ ମୋଟ୍ ୧୦୬ ରନ୍ ସଂଗ୍ରହ କରି ମ୍ୟାଚ ଶେଷ ବେଳକୁ ଅପରାଜିତ ରହିଥିଲେ । ତେବେ ଶିଖର ଧାୱନଙ୍କ ସହ ଓପନିଂ କରୁଥିବା ଦିଲ୍ଲୀ କ୍ୟାପିଟାଲ୍ସର ଯୁବ ଓପନର ପୃଥୀ ଶ ଲଗାତର ଦୁଇଥର ଶୂନ୍ୟରେ ଆଉଟ ହେବା ପରେ ଆଜିର ମ୍ୟାଚରେ ଖାତା ଖୋଲିବାରେ ସକ୍ଷମ ହୋଇଥିଲେ ମଧ୍ୟ ମାତ୍ର ୭ ରନରେ ଆଉଟ ହୋଇ ପ୍ୟାଭିଲିୟନ ଫେରିଥିଲେ । ସେହିପରି ଦିଲ୍ଲୀ କ୍ୟାପିଟାଲ୍ସର ଅଧିନାୟକ ଶ୍ରେୟସ ଆୟର ଓ ଆହତ ସମସ୍ୟାରୁ ବହାରି ଆଜିର ମ୍ୟାଚ ଖେଳୁଥିବା ୱିକେଟ କିପର ବ୍ୟାଟ୍ସମ୍ୟାନ ରିଷଭ ପନ୍ତ ମାତ୍ର ୧୪ ରନ୍ ଲେଖାଏଁ କରି ପ୍ୟାଭିଳିୟନ ଫେରିଥିଲେ ।
ଅନ୍ୟପଟେ ଗତ ମ୍ୟାଚରେ ଡବଲ ସୁପର ଓଭରରେ ମୁମ୍ବାଇକୁ ପରାସ୍ତ କରିଥିବା ପଞ୍ଜାବ ମଧ୍ୟ ତାର ବୋଲରଙ୍କ ବଳରେ ଦିଲ୍ଲୀ କ୍ୟାପିଟାଲ୍ସକୁ ୧୬୪ ରନ ମଧ୍ୟରେ ସୀମିତ ରଖିପାରିଥିଲା । ପଞ୍ଜାବର ଦମଦାର ବୋଲର ମହମ୍ମଦ ସାମି ୪ ଓଭରରେ ୨୮ ରନ ଦେଇ ୨ଟି ୱିକେଟ ଅସ୍ତିଆର କରିଥିବା ବେଳେ ମାକ୍ସୱେଲ ୧, ନସୀମ ୧ ଓ ମୃଗାନ ଅଶ୍ବନୀ ଗୋଟିଏ ୱିକେଟ ନେଇଥିଲେ ।
ସୂଚନାଯୋଗ୍ୟ ପଞ୍ଜାବ ଚୂଡ଼ାନ୍ତ ଏକାଦଶରେ ଗୋଟିଏ ପରିବର୍ତ୍ତନ କରିଛି । କ୍ରିସ୍ ଜୋର୍ଡାନଙ୍କ ବଦଳରେ ଜମ୍ମି ନିଶମଙ୍କୁ ସ୍ଥାନ ମିଳିଛି । ପଞ୍ଜାବ ତା’ର ଶେଷ ମ୍ୟାଚ୍ରେ ମୁମ୍ବାଇକୁ ଡବଲ ସୁପର ଓଭର ମୁକାବିଲାରେ ପରାସ୍ତ କରିଥିଲା ।
ଦିଲ୍ଲୀ ଏହି ମ୍ୟାଚ୍ରେ ୩ଟି ପରିବର୍ତ୍ତନ କରିଛି । ଚଳିତ ଆଇପିଏଲରେ ଦିଲ୍ଲୀ ପାଇଁ ଡେବ୍ୟୁ କରିବାକୁ ଯାଉଛନ୍ତି ବାମହାତୀ ଦ୍ରୁତ ବୋଲର ଡାନିଏଲ ସାମ୍ସ । ତାଙ୍କୁ ଅନିରିଚ ନୋର୍ଜେଙ୍କ ବଦଳରେ ସାମିଲ କରାଯାଇଛି । ସେହିପରି ଆହତ କାରଣରୁ ବାଦ୍ ପଡ଼ିଥିବା ଋଷଭ ପନ୍ତ ଆଜି ଦଳକୁ କମବ୍ୟାକ୍ କରିଛନ୍ତି । ତାଙ୍କ ସହ ଶିମରନ ହେଟମେୟର ମଧ୍ୟ ଚୂଡ଼ାନ୍ତ ଏକାଦଶରେ ରହିଛନ୍ତି ।
