କେନ୍ଦୁଝରଗଡ଼: କାଞ୍ଜିପାଣି ଥାନା ଅଧିନ କୁସୁମଘାଟିରେ ଶୁକ୍ରବାର ଅପରାହ୍ନରେ ଏକ ଲୁହାପଥର ବୋଝେଇ ୧୨ଚକିଆ ଟ୍ରକ ଭାରସାମ୍ୟ ହରାଇ ଓଲଟି ପଡିବାରୁ ଘଟଣାସ୍ଥଳରେ ଡ୍ରାଇଭରର ମୃତ୍ୟୁ ହୋଇଥିବା ସୂଚନା ମିଳିଛି। ଅପରପକ୍ଷରେ ଟ୍ରକଟିର ହେଲପରକୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ନିକଟସ୍ଥ ତେଲକୋଇ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି କରାଯାଇଛି।
ଓଡି-୦୬ଏ-୬୦୫୦ନମ୍ବର ୧୨ଚକିଆ ଟ୍ରକ ଲୁହାପଥର ବୋଝେଇ କରି ଅନୁଗୁଳ ଜିଲାକୁ ଯାଉଥିବା ବେଳେ ଶୁକ୍ରବାର ଅପରାହ୍ନ ପ୍ରାୟ ୪ଟା ବେଳେ କାଞ୍ଜିପାଣି-ତେଲକୋଇ ରାସ୍ତାରେ ଥିବା କୁସୁମଘାଟି ନିକଟରେ ଭରସାମ୍ୟ ହରାଇ ଘାଟି ତଳକୁ ଟ୍ରକଟି ଓଲଟି ପଡିଥିଲା। ଫଳରେ ଟ୍ରକ ଚାଳକ ଢ଼େଙ୍କାନାଳ ଜିଲା ସାଆନ୍ତପୁର ଗ୍ରାମର ରବି ନାରାୟଣ ରାଉତଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିବା ବେଳେ ହେଲପର ସିପୁ ଯାଦବଙ୍କୁ ଗୁରୁତର ଅବସ୍ଥାରେ ତେଲକୋଇ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି। ଖବରପାଇ କାଞ୍ଜିପାଣି ଥାନା ପୁଲିସ ଘଟଣାସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ଟ୍ରକକୁ ଜବତ କରିବା ସହ ଏକ ଅପମୃତ୍ୟୁ ମାମଲା ରୁଜୁ କରି ମୃତ ଚାଳକଙ୍କ ଶବକୁ ବ୍ୟବଛେଦ ପାଇଁ ଜିଲା ମୁଖ୍ୟ ଚିକିତ୍ସାଳୟକୁ ପଠାଇ ଅଧିକ ତଦନ୍ତ ଜାରି ରଖିଛି।
Comments are closed.