ଫୁଲବାଣୀ : ମଙ୍ଗଳବାର ହେଉଛି ପ୍ରଥମାଷ୍ଟାମି । ଏହି ପ୍ରଥମାଷ୍ଟାମି ପାଇଁ କନ୍ଧମାଳ ଜିଲାର ହଳଦୀ ପତ୍ର ବେଶ୍ ଚାହିଦା ରହିଛି । ଇତି ମଧ୍ୟରେ ଜିଲାର ଯେଉଁ ସବୁ ଅଞ୍ଚଳରେ ହଳଦୀ ଚାଷ ହେଉଛି ସେହି ସବୁ ଅଞ୍ଚଳର ଗାଡ଼ି ଗାଡ଼ି ହଳଦୀ ପତ୍ର ରାଜ୍ୟର କଟକ , ଭୁବନେଶ୍ୱର , ବ୍ରହ୍ମପୁର , ବାଲେଶ୍ୱର , ଭଦ୍ରକ ଭଳି ଉପକୁଳ ସହର ଓ ରାଜ୍ୟର ଅନେକ ଅଞ୍ଚଳକୁ ବ୍ୟବସାୟୀ ମାନେ ବୋହି ନେଇଛନ୍ତି । ରାଜ୍ୟର ଅନେକ ଅଞ୍ଚଳରେ ଏହି ପ୍ରଥମାଷ୍ଟମି ଅବସରରେ ଚହଟିବ କନ୍ଧମାଳ ହଳଦୀ ପତ୍ର ବାସ୍ନା । ପ୍ରଥମାଷ୍ଟମିରେ ପ୍ରତି ଓଡ଼ିଆଙ୍କ ଘରେ ଘରେ ହୋଇଥାଏ ଏଣ୍ଡୁରିପିଠା । ଏହି ପିଠାକୁ ପୂଜା କରିଥାନ୍ତି ।
ଏହି ପିଠାପାଇଁ ଆବଶ୍ୟକ ପଡ଼ିଥାଏ ହଳଦୀ ପତ୍ର । ହଳଦୀ ପତ୍ରରେ ତିଆରି ଏଣ୍ଡୁରି ପିଠାର ସ୍ୱାଦ କିଛି ନିଆରା । ହଳାଦୀରେ ଯେଭଳି ଭାବେ ଔଷଧିୟ ଗୁଣ ଭରି ହୋଇ ରହିଛି ଠିକ୍ ସେହିଭଳି ହଳଦୀ ପତ୍ରରେ ମଧ୍ୟ ରହିଛି ଅନେକ ଔଷଧିୟ ଗୁଣ । ଏହି ପତ୍ରକୁ ବହୁ ବ୍ୟବସାୟୀ ଜିଲାର ବିଭିନ୍ନ ଅଞ୍ଚଳରୁ କ୍ରୟ କରି କଟକ ବାଲିଯାତ୍ରାରେ ମଧ୍ୟ ବିକ୍ରି କରିବାପାଇଁ ନେଇଥିବାର ପ୍ରକାଶ କରିଛନ୍ତି । ଏହି ହଦଳୀପତ୍ର ଯୋଗୁଁ ବ୍ୟବସାୟ ସମେତ ଚାଷୀମାନେ କିଛି କିଛି ଟଙ୍କା ମଧ୍ୟ ରୋଜଗାର କରିବା ସମ୍ଭବ ହୋଇପାରିଛି ବୋଲି ଅନେକ ଚାଷୀ ପ୍ରକାଶ କରିଛନ୍ତି । କନ୍ଧମାଳ ଜିଲାର ବିଭିନ୍ନ ଅଞ୍ଚଳରେ ୧୦ ଗୋଟି ହଳଦୀ ପତ୍ର ବିଡ଼ାକୁ ଚାଷୀମାନେ ପ୍ରାୟ ୨ ରୁ ୪ ଟଙ୍କାରେ ବିକ୍ରି କରୁଥିବା ବେଳେ ଏହି ପାରିଶ୍ରମିକ ବାବଦକୁ ୨୦୦ ରୁ ୩୦୦ ଟଙ୍କା ଲେଖାଏଁ ରୋଜଗାର କରିପାରିଛନ୍ତି ବୋଲି ଅନେକ ଚାଷୀ ମାନେ ମଧ୍ୟ ପ୍ରକାଶ କରିଛନ୍ତି ।
