ଫୁଲବାଣୀ: କରୋନା ମହାମାରୀ ଯୋଗୁଁ ପ୍ରଶାସନ ଦୀର୍ଘ ୪ ମାସରୁ ଊର୍ଦ୍ଧ୍ବ ସମୟ ଧରି କଟକଣା ଲାଗୁ କରିଥିଲା। ଫଳରେ ଜିଲ୍ଲାର ସମସ୍ତ ଦୋକାନ ବଜାର ବନ୍ଦ ରହିଥିଲା। ତେବେ ପ୍ରଶାସନ ଲାଗୁ କରିଥିବା କଟକଣାକୁ ଗତ ୮ ତାରିଖରୁ କିଛି କୋହଳ କରାଯାଇଛି। କେବଳ ଚା’, ପାନ, ଗୁଟଖା ଦୋକାନକୁ ଛାଡି ଅନ୍ୟ ସମସ୍ତ ଦୋକାନ ସକାଳ ୭ଟାରୁ ମଧ୍ୟାହ୍ନ ୧ଟା ପର୍ଯ୍ୟନ୍ତ ଖୋଲିବାକୁ ଅନୁମତି ଦେଇଛି। ପ୍ରଶାସନ ଏହି ନିଷ୍ପତି ଯୋଗୁଁ କନ୍ଧମାଳ ଜିଲାର ଶହ ଶହ ଚାହା ଦୋକାନି ଚିନ୍ତାରେ ପଡ଼ିଛନ୍ତି।
ଗୋଟିଏ ପଟେ କରୋନା କଟକଣା ଯୋଗୁଁ ଦୋକାନ ବଜାର ଖୋଲାଯାଉ ନଥିବା ବେଳେ ଘରେ ଅନେକଙ୍କର ଚୁଲି ଜଳିବା କଷ୍ଟ ଦାୟକ ହୋଇ ପଡିଥିବା ବେଳେ ଏବେ ପୁଣି ବନ୍ଦ ପାଇଁ କଡ଼ା ଚେତାବନି ଚିନ୍ତାରେ ପକାଇଛି ଚାହା ବ୍ୟବସାୟୀମାନଙ୍କୁ। ଦୋକାନ ନଖୋଲିଲେ ସେପଟେ ଖାଇବା ବନ୍ଦ। ଏପଟେ ଦୋକାନ ଖୋଲିଲେ ଜରିମାନା ପାଇଁ ତାଗିଦ। ତେବେ ଏହି କଡ଼ା ନିର୍ଦ୍ଦେଶନାମା ଯୋଗୁଁ ଜିଲାର ଫୁଲବାଣୀ ସମେତ ସମଗ୍ର ଜିଲାରେ ଶତାଧିକ ଚାହା ଦୋକାନୀଙ୍କ ମଧ୍ୟରେ ଅସନ୍ତୋଷ ଦେଖା ଦେଇଛି।
ଦୀର୍ଘ ୪ ମାସ କାଳ ପ୍ରଶାସନର ଲକଡାଉନ୍, ସଟଡାଉନ୍ ଓ କଂଟେନମେଂଟ ଜୋନ ଯୋଗୁଁ ସେମାନଙ୍କ ଦୋକାନ ଖୋଲି ପାରିନାହାନ୍ତି। ଫଳରେ ସେମାନଙ୍କ ରୋଜଗାର ବନ୍ଦ ହୋଇଯାଇଥିବା ସହ ପରିବାର ଲୋକେ ନାହିଁ ନଥିବା ଦୁର୍ଦଶା ଭୋଗ କରୁଛନ୍ତି। ଓଳିଏ ଖାଇଲେ ଓଳିଏ ଭୋକରେ ରହୁଛନ୍ତି। ବୃଦ୍ଧ ପିତାମାତାଙ୍କୁ ଔଷଧ ଟିକେ ଦେଇ ପାରୁନାହନ୍ତି। ତେଣୁ ଅନ୍ୟ ଦୋକାନ ଖୋଲିବା ପରି ଚାହା ଦୋକାନକୁ ମଧ୍ୟ କୋଭିଡ୍ ନିୟମ ପାଳନ ପୂର୍ବକ ଖୋଲିବାକୁ ଅନୁମତି ପ୍ରଦାନ କରିବାକୁ ଚା’ ଦୋକାନୀମାନେ ଦାବି କରିଛନ୍ତି। ନଚେତ୍ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ପେଟ ପାଇଁ ପରିବାର ସହିତ ଧାରଣା ଦେବେ ବୋଲି ଚେତାବନି ଦେଇଛନ୍ତି।
