କଲମପୁର: ବାରହା ଶିକାର ପାଇଁ ବିଛା ଯାଇଥିଲା ବିଦ୍ୟୁତ୍ ଫାସ । ଏହି ବିଦ୍ୟୁତ୍ ଫାସରେ ପସିଯାଇଥିଲେ ଥୁଆମୂଳ ରାମପୁର ବ୍ଲକ ଅଧିନସ୍ଥ ଉପରଟେମରା ଗ୍ରାମର ୧୮ ବର୍ଷିୟ ଯୁବତୀ ଯମୁନା ଜାନୀ । ବିଦ୍ୟୁତ ଆଘାତ ଦ୍ୱାରା ଘଟଣା ସ୍ଥଳରେ ହିଁ ତାର ମୃତ୍ୟୁ ଘଟିଥିଲା । ପ୍ରାପ୍ତ ସୂଚନା ଅନୁସାରେ ଗତ ୨୮ ନଭେମ୍ବର ୨୦୨୧ଦିନ ଉପରଟେମରା ଗ୍ରାମ ନିକଟସ୍ଥ ଜଙ୍ଗଲରେ ବିଦ୍ୟୁତ୍ ସଂଯୋଗର ଅପବ୍ୟବହାର କରି ବନ୍ୟ ଜନ୍ତୁ ଶିକାର ଉଦ୍ଦେଶ୍ୟରେ ବିଦ୍ୟୁତ୍ ଫାସ ବିଛା ଯାଇଥିଲା । ଏହା ଜାଣିନପାରେ ଶୌଚ ପାଇଁ ଯାଉଥିବା ବେଳେ ଯମୁନା ଏହି ଫାସରେ ପଡିଯାଇଥିଲା । ଯାହାରି ଫଳରେ ଘଟଣା ସ୍ଥଳରେ ହିଁ ଯମୁନାର ମୃତ୍ୟୁ ହେଇଥିଲା । ଏନେଇ ସ୍ଥାନୀୟ ପୁଲିସରେ ମାମଲା ରୁଜୁ ହେବା ସହ ସମାଜିକ କର୍ମୀ ଦିଲ୍ଲୀପ କୁମାର ଦାସ ଜାତୀୟ ମାନବାଧିକାର କମିଶନଙ୍କ ନିକଟରେ ଅଭିଯୋଗ ଦାଖଲ କରିଥିଲେ । ବିଦ୍ୟୁତ୍ ବିଭାଗର ଅବହେଳା ପାଇଁ ବିଦ୍ୟୁତର ଅପବ୍ୟବହାର କରାଯାଇ ଜଣେ ନିରୀହର ଜୀବନ ଅକାଳରେ ଝରି ପଡିଲା ।
ତେଣୁ କାର୍ଯ୍ୟରେ ଅବହେଲା କରିଥିବା ବିଦ୍ୟୁତ୍ କର୍ମଚାରୀଙ୍କ ପ୍ରତି ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରି ମୃତକର ପରିବାର ପ୍ରତି କ୍ଷତିପୂରଣ ଦେବା ପାଇଁ ଅନୁରୋଧ କରିଥିଲେ । ମାନବାଧିକାର କମିଶନ କେସନଂ ୩୩୧୯ରେ ମାମଲା ରୁଜୁ କରି ବିଦ୍ୟୁତ୍ ବିଭାଗ ସଚିବ, କଳାହାଣ୍ଡି ଜିଲ୍ଲା ଆରକ୍ଷୀ ଅଧିକ୍ଷକଙ୍କୁ ନୋଟିସ ଜାରି କରି ଆଠ ସପ୍ତାହ ମଧ୍ୟରେ ବିହିତ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଥିଲେ । ଏହି ନୋଟିସ ପାଇବା ପରେ ଟାଟାପାୱାର ପକ୍ଷରୁ ଯମୁନା ଜାନୀର ପିତା କାଂଚୁ ଜାନୀଙ୍କୁ ଚେକ ମାଧ୍ୟମରେ ଏକ ଲକ୍ଷ ଟଙ୍କାର ସହାୟତା ପ୍ରଦାନ କରିଛନ୍ତି ।
Comments are closed.