ନୂଆଦିଲ୍ଲୀ : ବିଜେପିର ବରିଷ୍ଠ ନେତା ତଥା ଗୁଜରାଟର ପୂର୍ବତନ କ୍ୟାବିନେଟ ମନ୍ତ୍ରୀ ଜୟନାରାୟଣ ଭ୍ୟାସ ଗରୁବାର ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ)ର ନବନିଯୁକ୍ତ ଗଭର୍ଣ୍ଣର ଶକ୍ତିକାନ୍ତ ଦାସଙ୍କ ଦକ୍ଷତା ନେଇ ପ୍ରଶ୍ନ ଉଠାଇଛନ୍ତି। ସୋମବାର ଉର୍ଜିତ ପଟେଲ ରିଜର୍ଭ ବ୍ୟାଙ୍କ ଗଭର୍ଣ୍ଣର ପଦରୁ ଇସ୍ତଫା ଦେବା ପରେ କେନ୍ଦ୍ର ସରକାର ଅବସରପ୍ରାପ୍ତ ଆଇଏଏସ୍ ଅଧିକାରୀ ଶକ୍ତିକାନ୍ତ ଦାସଙ୍କୁ ତାଙ୍କ ସ୍ଥାନରେ ଅବସ୍ଥାପିତ କରିଛନ୍ତି। ବୁଧବାର ଶକ୍ତିକାନ୍ତ ରିଜର୍ଭ ବ୍ୟାଙ୍କର ନୂଆ ଗଭର୍ଣ୍ଣର ଭାବେ କାର୍ଯ୍ୟଭାର ଗ୍ରହଣ କରିଛନ୍ତି। ତାଙ୍କ ନିଯୁକ୍ତିକୁ ନେଇ ବିଭିନ୍ନ ମହଲରେ ପ୍ରଶ୍ନ ଉଠିବାରେ ଲାଗିଛି। ଗୁଜରାଟ ବିଜେପି ନେତା ଜୟ ନାରାୟଣ ଭ୍ୟାସ କହିଛନ୍ତି ଯେ ‘ନୂଆ ଆରବିଆଇ ଗଭର୍ଣ୍ଣର ଶକ୍ତିକାନ୍ତଙ୍କ ଶିକ୍ଷାଗତ ଯୋଗ୍ୟତା ହେଉଛି ଇତିହାସରେ ସ୍ନାତକୋତ୍ତର। ସେ ଯେପରି ଆରବିଆଇକୁ ଇତିହାସ କରିନଦିଅନ୍ତି ସେଥିପାଇଁ ପ୍ରାର୍ଥନା କର। ଶକ୍ତିକାନ୍ତ ହେଉଛନ୍ତି ୧୯୮୦ ବ୍ୟାଚ୍ ତାମିଲନାଡୁ କ୍ୟାଡର୍ର ଆଇଏଏସ୍ ଅଧିକାରୀ ଓ ଦିଲ୍ଲୀ ବିଶ୍ୱବିଦ୍ୟାଳୟରୁ ଇତିହାସରେ ସ୍ନାତକୋତ୍ତରଧାରୀ। ଅବସର ପରେ ସେ ନୂଆ ଦାୟିତ୍ୱ ପାଇଛନ୍ତି। ଏହି ନୂଆ ଗଭର୍ଣ୍ଣରଙ୍କୁ ଭଗବାନ ସାହା ହୁଅନ୍ତୁ।’
ଉଲ୍ଲେଖ ଯୋଗ୍ୟ ଯେ ନରେନ୍ଦ୍ର ମୋଦୀ ଗୁଜରାଟର ମୁଖ୍ୟମନ୍ତ୍ରୀ ଥିବାବେଳେ ଭ୍ୟାସ କ୍ୟାବିନେଟ ମନ୍ତ୍ରୀ ଥିଲେ। ଭ୍ୟାସ୍ ଏନେଇ କରିଥିବା ଟ୍ୱିଟ୍ ୮୪୨ ଥର ରିଟ୍ୱିଟ୍ ହୋଇସାରିଲାଣି।
ଏହା ପୂର୍ବରୁ ବିଜେପି ସାଂସଦ ସୁବ୍ରମଣ୍ୟମ ସ୍ୱାମୀ ଅଭିଯୋଗ କରିଥିଲେ ଯେ ନବନିଯୁକ୍ତ ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ ଜଣେ ଦୁର୍ନୀତିଗ୍ରସ୍ତ ଅଧିକାରୀ ଓ ସେ ପୂର୍ବରୁ ଦୁର୍ନୀତିରେ ଲିପ୍ତ ରହିଥିଲେ। ସ୍ୱାମୀ କହିଛନ୍ତି ଯେ ଦାସଙ୍କୁ ଆରବିଆଇ ଗଭର୍ଣ୍ଣର ଭାବେ ନିଯୁକ୍ତ କରିବା ଏକ ଭୁଲ ନିଷ୍ପତ୍ତି। ସେ ଏନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନିକଟକୁ ଚିଠି ଲେଖିଥିବା ପ୍ରକାଶ କରିଥିଲେ।
ଆରବିଆଇର ନବନିଯୁକ୍ତ ଗଭର୍ଣ୍ଣରଙ୍କ ଦକ୍ଷତା ନେଇ ପ୍ରଶ୍ନ ଉଠାଇଲେ ବିଜେପି ନେତା
Popular Categories
Previous article
Next article