ଯାଜପୁର : ଯାଜପୁର ଜିଲା କୋରେଇ ଅଞ୍ଚଳର ବହୁ ଚର୍ଚ୍ଚିତ ତୃତୀୟ ବିବାହ ମାମଲାରେ ଗୁରୁବାର ଅଭିଯୁକ୍ତ ଇମ୍ରାନକୁ ଯାଜପୁର ପୁଲିସ ଭଦ୍ରକ ସୀମାନ୍ତରୁ ଗିରଫ କରିଛି। ଇମ୍ରାନ ପ୍ରଥମ ସ୍ତ୍ରୀକୁ ତଲାକ ଦେବାପରେ ଦ୍ଵିତୀୟ ବିବାହ କରିଥିଲେ ମଙ୍ଗଳପୁର ଅଞ୍ଚଳର ସବିନା ବିବିଙ୍କୁ। ତେବେ ସବିନାଙ୍କ ସହ କିଛି ଦିନ ରହିବା ପରେ ଇମ୍ରାନ ତାଙ୍କୁ ଛାଡ଼ିଦେଇ ଦେଶ ବାହାରକୁ ଚାଲିଯାଇଥିଲେ। ଫଳରେ ସବିନାଙ୍କ ଉପରେ ଶାଶୁ, ଶଶୁର,ଦେଢଶୁର ଏବଂ ଅନ୍ୟମାନେ ଯୌତୁକ ନିର୍ଯ୍ୟାତନା ଦେଉଥିବା ଅଭିଯୋଗ ହୋଇଥିଲା। ସବିନା ତାଙ୍କ ବାପଘରକୁ ନିର୍ଯ୍ୟାତନା ସହିନପାରି ପଳାଇଥିଲେ। ତାଙ୍କର ଗୋଟିଏ ଝିଅ ମଧ୍ୟ ଥିଲା।
ତେବେ ଇମ୍ରାନ ପୁଣିଥରେ ଗତ ୧୦ ତାରିଖରେ କୋରେଇ ଠାରେ ତୃତୀୟ ବିବାହ କରୁଥିବା ବେଳେ ସେଠାରେ ପହଞ୍ଚିଥିଲେ ଦ୍ଵିତୀୟ ସ୍ତ୍ରୀ ସବିନା ଏବଂ ସେଠାରେ ଉଭୟ ପକ୍ଷ ମଧ୍ୟରେ ଧସ୍ତାଧସ୍ତି ମଧ୍ୟ ହୋଇଥିଲା। ଏ ସମ୍ପର୍କରେ କୋରେଇ ଥାନାରେ ଅଭିଯୋଗ ହେବା ପରେ ପୋଲିସ ସବିନାଙ୍କ ଶ୍ୱଶୁର, ଦେଢଶୁରଙ୍କୁ ପ୍ରଥମେ ଗିରଫ କରି କୋର୍ଟ ଚାଲାଣ କରିଥିଲା ଏବଂ ଆଜି ସବିନାଙ୍କ ନଣନ୍ଦ ଓ ବଡ ଯାଆଙ୍କୁ ଥାନାରେ ଅଟକ ରଖିଥିଲେ। ତେବେ ଇମ୍ରାନଙ୍କ ଗିରଫ ପରେ ପୁଲିସ ଇମ୍ରାନଙ୍କୁ ଆସନ୍ତା କାଲି ପ୍ରେସମିଟ କରି ଉପସ୍ଥାପନ କରିବ ବୋଲି ସୂଚନା ମିଳିଛି ।
Comments are closed.