କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ଏଚ ଡି କୁମାରସ୍ୱାମୀ ଡାକ୍ତରଖାନାରେ ଭର୍ତ୍ତି; ସ୍ବାସ୍ଥ୍ୟାବସ୍ଥା ସ୍ଥିର

ବେଙ୍ଗାଲୁରୁ: କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ତଥା ଜନତା ଦଳ(ସେକ୍ୟୁଲାର) ନେତା ଏଚ ଡି କୁମାରସ୍ୱାମୀଙ୍କୁ ଅସୁସ୍ଥତା କାରଣରୁ ଡାକ୍ତରଖାନାରେ ଭର୍ତ୍ତି କରାଯାଇଛି। କୁମାରସ୍ୱାମୀ କ୍ଳାନ୍ତ ଓ ଦୁର୍ବଳ ଅନୁଭବ କରୁଥିବା କହିବା ପରେ ତାଙ୍କୁ ବେଙ୍ଗାଲୁରୁର ଏକ ଡାକ୍ତରଖାନାରେ ଭର୍ତ୍ତି କରାଯାଇଛି। ବର୍ତ୍ତମାନ ତାଙ୍କ ସ୍ବାସ୍ଥ୍ୟାବସ୍ଥା ସ୍ଥିର ଅଛି ଏବଂ ସେ ଧିରେଧିରେ ସୁସ୍ଥ ହେଉଛନ୍ତି। ଏନେଇ ଡାକ୍ତରଖାନା ପକ୍ଷରୁ ରବିବାର ସୂଚନା ଦିଆଯାଇଛି। କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି ଯେ, ୬୩ ବର୍ଷିୟ କୁମାରସ୍ୱାମୀଙ୍କୁ ଜ୍ୱର ହୋଇଥିଲା ଏବଂ ଡାକ୍ତର ତାଙ୍କୁ ବିଶ୍ରାମ ନେବାକୁ ପରାମର୍ଶ ଦେଇଥିଲେ। କିନ୍ତୁ ସେ ଲଗାତର ରାଜ୍ୟ ଗସ୍ତରେ ବ୍ୟସ୍ତ ରହୁଥି‌ଲେ।

ଡାକ୍ତରଖାନା ପକ୍ଷରୁ କୁହାଯାଇଛି, “ଏଚଡି କୁମାରସ୍ୱାମୀଙ୍କୁ ୨୨ ଏପ୍ରିଲ ୨୦୨୩ ସନ୍ଧ୍ୟାରେ ବେଙ୍ଗାଲୁରୁର ଓଲ୍ଡ ଏୟାରପୋର୍ଟ ରୋଡ ସ୍ଥିତ ମଣିପାଲ ହସ୍ପିଟାଲରେ ଭର୍ତ୍ତି କରାଯାଇଥିଲା ଏବଂ ଡାକ୍ତର ସତ୍ୟନାରାୟଣ ମୈସୁର ତାଙ୍କ ଚିକିତ୍ସା କରୁଛନ୍ତି। ତାଙ୍କୁ ଥକାପଣ ଓ ସାମାନ୍ୟ ଦୁର୍ବଳତା ଅନୁଭବ ହେଉଥିଲା। ତାଙ୍କର ସମସ୍ତ ପ୍ରକାର ପରୀକ୍ଷା ନୀରିକ୍ଷା ଓ ଉପଯୁକ୍ତ ଚିକିତ୍ସା କରାଯାଉଛି। ବର୍ତ୍ତମାନ ତାଙ୍କ ସ୍ବାସ୍ଥ୍ୟାବସ୍ଥା ସ୍ଥିର ରହିଛି।’’

ସୂଚନାଯୋଗ୍ୟ, ପୂର୍ବରୁ ଏଚ୍‌ଡି କୁମାରସ୍ୱାମୀଙ୍କର ହୃଦୟ ଅସ୍ତ୍ରୋପଚାର ହୋଇଥିଲା।