ନୂଆଦିଲ୍ଲୀ: ବିଶ୍ବ ଫୁଟବଲର ସର୍ବୋଚ୍ଚ ପରିଚାଳନା ସଂସ୍ଥା (ଫିଫା) ପକ୍ଷରୁ ଗୁରୁବାର ନୂତନ ଭାବେ ପୁରୁଷ ଫୁଟବଲ ମାନ୍ୟତା ପ୍ରଦାନ କରାଯାଇଛି। ମାନ୍ୟତାର ୧୦୫ତମ ସ୍ଥାନରେ ଭାରତ ରହିଛି। ବେଲଜିୟମ ଏକ ନମ୍ବର ସ୍ଥାନରେ ରହିଥିବା ବେଳେ ଫ୍ରାନ୍ସ ଦ୍ବିତୀୟ ,ବ୍ରାଜିଲ ୩ୟ, ଇଂଲଣ୍ଡ ୪ର୍ଥ ଓ ପର୍ତ୍ତୁଗାଲ ୫ମ ସ୍ଥାନରେ ରହିଛନ୍ତି। ଭାରତ ବାହାରିନ୍ ଓ ୟୁକ୍ରେନ ବିପକ୍ଷ ବନ୍ଧୁତ୍ବପୂର୍ଣ୍ଣ ଅନ୍ତର୍ଜାତୀୟ ମ୍ୟାଚରେ ଭଲ ପ୍ରଦର୍ଶନ କରି ୧୦୯ତମ ସ୍ଥାନରୁ ୧୦୫ତମ ସ୍ଥାନକୁ ଉନ୍ନୀତ ହୋଇଛି। ୨୧୦ଟି ଫୁଟବଲ ରାଷ୍ଟ୍ରକୁ ନେଇ ମାନ୍ୟତା ପ୍ରଦାନ କରାଯାଇଛି।
ଅନ୍ତର୍ଜାତୀୟ ଫୁଟବଲ ପ୍ରତିଯୋଗିତାକୁ ଆଧାର କରି ଏହି ମାନ୍ୟତା ପ୍ରଦାନ କରାଯାଉଛି। ଆସନ୍ତା ଜୁନ ମଧ୍ୟଭାଗରେ ଏସିଆନ ଫିଫା ବିଶ୍ବକପ ୨୦୨୨ ଯୋଗ୍ୟତାପର୍ଯ୍ୟାୟ ଏସିଆନ ପର୍ଯ୍ୟାୟ ମ୍ୟାଚ ଅନୁଷ୍ଠିତ ହେବ। ଏହାଛଡ଼ା ୨୦୨୧ ଫିଫା ଆରବ କପ୍ ମଧ୍ୟ ଅନୁଷ୍ଠିତ ହେବ। ମହିଳା ବିଭାଗରେ ଆମେରିକା ଆଗରେ ରହିଥିବା ବେଳେ ଜର୍ମାନୀ, ଦ୍ବିତୀୟ, ନେଦରଲାଣ୍ଡସ୍ ତୃତୀୟ, ଫ୍ରାନ୍ସ ୪ର୍ଥ ଓ ସ୍ବିଡେନ ୫ମ ସ୍ଥାନରେ ରହିଛନ୍ତି।
