ପୂର୍ବତନ ବିଧାୟକ ଅଶ୍ୱିନୀ ଗୁରୁଙ୍କ ପରଲୋକ

ସମ୍ବଲପୁର : ସମ୍ବଲପୁରର ପୂର୍ବତନ ବିଧାୟକ ଅଶ୍ୱିନୀ ଗୁରୁଙ୍କ ୭୦ ବର୍ଷ ବୟସରେ ପରଲୋକ ହୋଇଯାଇଛି। ସେ ତାଙ୍କର ଝିଅ ଘର ବ୍ରଜରାଜନଗର ଠାରେ ବିଗତ କିଛି ଦିନ ହେବ ରହୁଥିବା ବେଳେ ଅଚାନକ ହୃଦଘାତ ହେବାରୁ ତାଙ୍କର ପରଲୋକ ହୋଇଛି। ସ୍ୱର୍ଗତ ଗୁରୁ ଛାତ୍ରାବସ୍ଥାରୁ ଭାରତୀୟ ଜାତୀୟ କଂଗ୍ରେସ ପାଇଁ ଜୀବନବ୍ୟାପି କାର୍ଯ୍ୟ କରି ଆସିଥିଲେ। ୧୯୮୦ ମସିହାରେ ସମ୍ବଲପୁରର ବିଧାୟକ ଭାବେ ବିଧାନସଭାକୁ ନିର୍ବାଚିତ ହୋଇଥିଲେ। ସ୍ୱର୍ଗତ ଗୁରୁ ସମ୍ବଲପୁର ନିର୍ବାଚାନ ମଣ୍ଡଳୀର ସର୍ବକନିଷ୍ଠ ବିଧାୟକ ହେବା ସହିତ ସେ ତାଙ୍କର ନିକଟତମ ପ୍ରତିଦ୍ୱନ୍ଦୀଙ୍କୁ ୬୪ ପ୍ରତିଶତରେ ହରାଇ ଓଡିଶାର ୮ତମ ବିଧାନସଭାକୁ ନିର୍ବାଚିତ ହୋଇଥିଲେ। ଯାହାକି ଏକ ବିରଳ କୃତୀତ୍ୱ ସହିତ ରେକର୍ଡ ଅଟେ ଏବଂ ଏହି ରେକର୍ଡ ଆଜି ପର୍ଯ୍ୟନ୍ତ ବଜାୟ ରହିଛି। ସ୍ୱର୍ଗତ ଗୁରୁ ଛାତ୍ର ଜୀବନରୁ ରାଜନୀତି ଓ ସମାଜସେବା ସହିତ ଜଡିତ ହୋଇ ଛାତ୍ର କଂଗ୍ରେସ, ବିଭିନ୍ନ ଶ୍ରମିକ ସଂଘ ଆଦିରେ ବିଭିନ୍ନ ପଦ ପଦବୀରେ ରହି ନିଷ୍ଠାର ସହିତ କାର୍ଯ୍ୟ କରି ସୁନାମ ଅର୍ଜନ କରିଥିଲେ। ସ୍ଥାନୀୟ ରାଜଘାଟ ଠାରେ ତାଙ୍କର ଅନ୍ତିମ ସଂସ୍କାର କରାଯାଇଛି। ସ୍ୱର୍ଗତ ଗୁରୁଙ୍କ ବିୟୋଗରେ ପୂର୍ବତନ ପିସିସି ସଭାପତି ଶରତ ପଟ୍ଟନାୟକ, ପୂର୍ବତନ ମନ୍ତ୍ରୀ ଜଗନ୍ନାଥ ପଟ୍ଟନାୟକ, ପୂର୍ବତନ ଜିଲା ସଭାପତି ସୁରେଶ୍ୱର ମିଶ୍ର, ଜିଲା ସଭାପତି ଜୟଶଙ୍କର ମିଶ୍ର ପ୍ରମୁଖ ଗଭୀର ଶୋକ ପ୍ରକାଶ ସହିତ ପରିବାରବର୍ଗଙ୍କୁ ସମବେଦନା ଜ୍ଞାପନ କରି ଦିବଙ୍ଗତଙ୍କ ଅମର ଆତ୍ମାର ସଦଗତି କାମନା କରିଛନ୍ତି।