ନୂଆଦିଲ୍ଲୀ: ଶନିବାର ବିଳମ୍ବିତ ରାତ୍ରରେ ଜମ୍ମୁ-କଶ୍ମୀରର ଶ୍ରୀନଗର ପନ୍ଥା ଚୌକ୍ ଅଞ୍ଚଳରେ ଆତଙ୍କବାଦୀ ଓ ସିଆରପିଏଫ, ପୁଲିସ ବାହିନୀ ମଧ୍ୟରେ ଗୁଳିବିନିମୟ ଘଟି ୩ଜଣ ଆତଙ୍କୀ ପ୍ରାଣ ହରାଇଥିବା ବେଳେ ଜମ୍ମୁ-କାଶ୍ମୀର ପୁଲିସର ଜଣେ ଏଏସଆଇ ବାବୁ ରାମ ସହିଦ ହୋଇଛନ୍ତି ।
ସୂଚନା ଅନୁଯାୟୀ, ଗତକାଲି ବିଳମ୍ବିତ ରାତିରେ ଶ୍ରୀନଗର ଉପକଣ୍ଠରେ ଅଲଟ୍ରା ବାହିନୀର ପାଟ୍ରୋଲିଂ କରୁଥିବା ପୁଲିସ ଦଳ ଉପରେ ଆତଙ୍କବାଦୀମାନେ ଗୁଳି ଚଳାଇବା ପରେ ସୁରକ୍ଷା ବାହିନୀ ଏବଂ ଆତଙ୍କବାଦୀଙ୍କ ମଧ୍ୟରେ ଏହି ଏନକାଉଣ୍ଟର ଆରମ୍ଭ ହୋଇଥିଲା। ପରେ ସମ୍ପୂର୍ଣ୍ଣ ଅଞ୍ଚଳକୁ ପୁଲିସ ସିଲ୍ କରିବା ସହ ସର୍ଚ୍ଚ ଅପରେସନ ଆରମ୍ଭ କରିଥିଲା। ଏହି ସମୟରେ ଆତଙ୍କବାଦୀମାନେ ପୁଣି ଗୁଳିମାଡ କରିଥିଲେ। ଏହାର ପ୍ରତି ଜବାବରେ ଯବାନମାନେ ମଧ୍ୟ ଫାୟାରିଂ କରିଥିଲେ। ଏଥିରେ ୩ଜଣ ଆତଙ୍କବାଦୀ ନିହତ ହୋଇଥିବାବେଳେ ଜମ୍ମୁ-କାଶ୍ମୀର ପୁଲିସର ଜଣେ ଏଏସଆଇ ସହିଦ ହୋଇଛନ୍ତି।
