ନୂଆଦିଲ୍ଲୀ : ଏଥର ଅନେକ ବଲିଉଡ଼ ସେଲିବ୍ରିଟି ନିଜ ଭାଗ୍ୟ ପରୀକ୍ଷା କରିବା ପାଇଁ ନିର୍ବାଚନ ମଇଦାନକୁ ଓହ୍ଲାଇଛନ୍ତି। ସେହିପରି ଦୁଇଜଣ ଅଭିନେତ୍ରୀ ହେଉଛନ୍ତି ନିକଟରେ କଂଗ୍ରେସରେ ସାମିଲ ହୋଇଥିବା ଉର୍ମିଳା ମାତୋଣ୍ଡକର ଓ ବିଜେପି ସାଂସଦ ହେମାମାଳିନୀ। ଉଭୟେ ନିଜର ନିର୍ବାଚନୀ ପ୍ରଚାର ଆରମ୍ଭ କରି ଦେଇଛନ୍ତି। ପ୍ରଚାର ପାଇଁ ଉର୍ମିଳା ଅଟୋ ଡ୍ରାଇଭର୍ ସାଜିଥିବା ବେଳେ ହେମାଙ୍କୁ କ୍ଷେତରେ ଫସଲ କାଟୁଥିବା ଦେଖିବାକୁ ମିଳିଛି। ତେବେ ଏସବୁକୁ ନେଇ ସାମାଜିକ ଗଣମାଧ୍ୟମରେ ଲୋକଙ୍କ ଅନେକ ଆଲୋଚନା ଓ ସମାଲୋଚନା ଦେଖିବାକୁ ମିଳିଛି।
ମୁମ୍ବଇ ଉତ୍ତର ଲୋକସଭା ଆସନରୁ ନିର୍ବାଚନ ଲଢୁଥିବା ଉର୍ମିଳାଙ୍କୁ ରବିବାର ଗୋରଇ(ମୁମ୍ବଇ) ଅଞ୍ଚଳର ଅଟୋ ଚାଳକଙ୍କ ସହ ଦେଖିବାକୁ ମିଳିଥିଲା। ସୂଚନା ଅନୁସାରେ, ଗୋରଇରେ କଂଗ୍ରେସ କାର୍ଯ୍ୟାଳୟ ଯିବା ସମୟରେ ସେ ଅଟୋ ଚାଳକମାନଙ୍କୁ ଭେଟିଥିଲେ ଓ ସେମାନଙ୍କୁ ଭୋଟ୍ ଦେବା ପାଇଁ ଅନୁରୋଧ କରିଥିଲେ। ଏଥିସହିତ ଅଟୋରେ ଚାଳକଙ୍କ ସ୍ଥାନରେ ବସି ଫଟୋ ମଧ୍ୟ ଉଠାଇଥିବା ଦେଖିବାକୁ ମିଳିଛି।
ଅନ୍ୟପକ୍ଷରେ ମଥୁରା ଲୋକସଭା ଆସନରୁ ନିର୍ବାଚନ ଲଢୁଥିବା ବିଜେପି ସାଂସଦ ହେମାମାଳିନୀ ମଧ୍ୟ ୩୧ ମାର୍ଚ୍ଚରୁ ନିଜ ନିର୍ବାଚନୀ ପ୍ରଚାର ଆରମ୍ଭ କରିଛନ୍ତି। ସଜବାଜ ହୋଇଥିବା ହେମା ଭୋଟ୍ ପାଇଁ କ୍ଷେତକୁ ଯାଇ ଫସଲ କାଟିଛନ୍ତି ଓ ସେହି ସମୟରେ ଫଟୋ ମଧ୍ୟ ଉଠାଇଛନ୍ତି। ଏଥିସହିତ ସାମାଜିକ ଗଣମାଧ୍ୟମରେ ସେହି ଫଟୋ ଗୁଡ଼ିକୁ ସେ ଶେୟାର କରିଛନ୍ତି। ତାଙ୍କର ଏହି ଫଟୋ ଦେଖି ଲୋକେ ତାଙ୍କୁ ସମାଲୋଚନା ପୂର୍ବକ ଅନେକ କମେଣ୍ଟ କରିଥିବା ଦେଖିବାକୁ ମିଳିଛି।
