ମୁମ୍ବାଇ: ମହାରାଷ୍ଟ୍ର ସରକାରରେ ସବୁ କିଛି ଠିକ୍ ନାହିଁ । ମହାବିକାଶ ଅଘାଡ଼ିରେ ସାମିଲ ହୋଇଥିବା ଏନସିପି ଓ କଂଗ୍ରେସ ଶିବସେନାର ମନୋଭାବକୁ ନେଇ ଅସୁଖୀ । ଏନସିପି କିଛି ଓଜନିଆ ମନ୍ତ୍ରୀ ପଦ ପାଇଥିବାରୁ ଏଥିନେଇ ତୁଣ୍ଡ ଖୋଲୁନାହିଁ । ହେଲେ କଂଗ୍ରେସ ଅବସ୍ଥା ଅତ୍ୟନ୍ତ ଖରାପ । ସମର୍ଥନ ପ୍ରତ୍ୟାହାର ନେଇ କିଛି କହି ପାରୁନାହିଁ, କିମ୍ବା ସେମାନଙ୍କୁ କରାଯାଉଥିବା ଅବହେଳାକୁ ବି ସହି ପାରୁ ନାହିଁ । ତେଣୁ ଆସନ୍ତାକାଲି ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ମହାରାଷ୍ଟ୍ର ପିସିସି ସଭାପତି ବାଲାସାହେବ ଥୋରାଟ ଏବଂ ମନ୍ତ୍ରୀ ଅଶୋକ ଚଭନ ଭେଟିବେ ବୋଲି ସୂଚନା ମିଳିଛି ।
ଦକ୍ଷିଣପନ୍ଥୀ ଓ ହିନ୍ଦୁତ୍ବବାଦୀ ଦଳ ଶିବସେନାକୁ ସମର୍ଥନ ଦେଇ ଏନସିପି ଓ କଂଗ୍ରେସ ମହାରାଷ୍ଟ୍ର ସରକାରରେ ସାମିଲ ହୋଇଛନ୍ତି । ମାତ୍ର ଅନେକ ସମୟରେ ଶିବସେନାର ଆଦର୍ଶ ସହ କଂଗ୍ରେସ ଓ ଏହାର ପରମ୍ପରାରେ ସମୃଦ୍ଧ ଏନସିପି ନିଜକୁ ଖାପ ଖୁଆଇ ପାରୁନାହାନ୍ତି । ସରକାର ତ ଚାଲିଛି, ମାତ୍ର ଏକତ୍ର ହୋଇ ରହିପାରି ନାହିଁ । ଏହାକୁ କଂଗ୍ରେସ ସ୍ବୀକାର କରିଛି।
କଂଗ୍ରେସ ନେତାମାନେ କୁଆଡ଼େ ଉଦ୍ଧବଙ୍କୁ ଭେଟିବାକୁ ବାରମ୍ବାର ଉଦ୍ୟମ କରୁଛନ୍ତି, ମାତ୍ର ସେମାନଙ୍କୁ ସମୟ ମିଳୁନାହିଁ । ବିଭିନ୍ନ ଗୁରୁତ୍ୱପୂର୍ଣ୍ଣ ବୈଠକରେ ଓ ସରକାରୀ କାର୍ଯ୍ୟକ୍ରମରେ ଯୋଗଦେବାକୁ କଂଗ୍ରେସ ନେତାଙ୍କୁ ନିମନ୍ତ୍ରଣ ଦିଆଯାଉନାହିଁ | ଏହାକୁ ନେଇ ଦଳ ମଧ୍ୟରେ ଅସନ୍ତୋଷ ତେଜୁଛି । ତେଣୁ ତୁରନ୍ତ ଏହାର ସମାଧାନ ନିମନ୍ତେ ଆଲୋଚନାର ଆବଶ୍ୟକତା ଅଛି ବୋଲି କଂଗ୍ରେସ କହିଛନ୍ତି ।
କଂଗ୍ରେସ କହିଛି ମୁଖ୍ୟମନ୍ତ୍ରୀଙ୍କୁ ଭେଟିବା ସମ୍ଭବପର ହେଉନାହିଁ । ରାଜ୍ୟରେ କ୍ଷମତାସୀନ ମହାବିକାଶ ଅଗାଡି ସରକାର-ଅମଲତନ୍ତ୍ର ମଧ୍ୟରେ କେତେକ ସମସ୍ୟା ରହିଛି। ସରକାରରେ ମେଣ୍ଟ ଅଂଶୀଦାର ଭାବେ ସାମିଲ ଥିବା କଂଗ୍ରେସକୁ ଆବଶ୍ୟକୀୟ ଗୁରୁତ୍ୱ ଦିଆଯାଉନାହିଁ ତେଣୁ ଏହାର ସମାଧାନ ହେବା ଆବଶ୍ୟକ ।
