ଦେଓଗାଁ: ଦେଓଗାଁ ବ୍ଳକ ଅନ୍ତର୍ଗତ ଗାଇବାହାଲ ପଞ୍ଚାୟତ ର ରତନପୁର ଗାଁରେ ଗୋଟିଏ ଘର ଉପରେ ଯାଇଥିବା ବିଦ୍ୟୁତ ତାର ଛିଣ୍ଡି ପଡିଯିବାରୁ ଏକ ଘର ଜଳିପାଉଁଶ ହୋଇଛି। ତେବେ ଏହି ଦୁର୍ଘଟଣାରେ ଅଳ୍ପକେ ବର୍ତ୍ତିଯାଇଛନ୍ତି ପରିବାର ଲୋକେ। ବୁଧବାର ଅପରାହ୍ଣରେ ଏହି ଗାଁର ଦୁଃଖ ରାଉତଙ୍କ ଘରଦେଇ ଯାଇଥିବା ବିଦ୍ୟୁତ ତାର ଦୁଇଟି ସ୍ପର୍ଶ ହେବାରୁ ନିଆଁ ହୁଲା ବାହାରି ଘର ଚାଳ ଉପରେ ପଡିଥିଲା। ଫଳରେ ଘରର ଆବାସପତ୍ର ସହ ନିକଟରେ ଥିବା ଗୁହାଳ ମଧ୍ୟ ଜଳିଯାଇଥିଲା। ନିଆଁ ଲାଗିବା ଖବର ପାଇଲାପରେ ଦେଓଗାଁ ଅଗ୍ନିଶମ ବିଭାଗ ପହଞ୍ଚି ନିଆଁକୁ ଆୟତ୍ତ କରିଥିଲେ। ଘରଉପରେ ଯାଇଥିବା ବିଦ୍ୟୁତ ତାରକୁ ସେଠାରୁ ହଟାଇବା ପାଇଁ ଶ୍ରୀ ରାଉତ ବିଦ୍ୟୁତ ବିଭାଗ ପାଖରେ ବାରମ୍ବାର ଦାବି କରିଆସୁଥିଲେ ସେଥିରେ ବିଭାଗୀୟ କର୍ତ୍ତୃପକ୍ଷ କୌଣସି ପଦକ୍ଷେପ ନେଇନାହାନ୍ତି। ଫଳରେ ଆଜି ଏଭଳି ଅଘଟଣ ଘଟିଛି ଏବଂ ଘରଟି ଜଳିଯାଇଛି ବୋଲି ଶ୍ରୀ ରାଉତ ଅଭିଯୋଗ କରିଛନ୍ତି। ଏଣୁ ବିଦ୍ୟୁତ ବିଭାଗ କ୍ଷତିଗ୍ରସ୍ତ ହୋଇଥିବା ପରିବାରକୁ କ୍ଷତିପୂରଣ ଯୋଗାଇଦେବାକୁ ସାଧାରଣରେ ଦାବି ହେଉଛି।
Popular Categories
Previous article
Next article