ରାଜ୍ୟରେ ନିୟନ୍ତ୍ରଣ ବାହାରେ ସାଇବର ଅପରାଧ

ଭୁବନେଶ୍ୱର : ଓଡ଼ିଶାରେ ସାଇବର ଅପରାଧ ବଢ଼ିବା ସହ ଦୈନିକ ସାଇବର ଠକେଇର ଶିକାର ହେଉଛନ୍ତି ସାଧାରଣ ଜନତା । ପୁଲିସ ପକ୍ଷରୁ ଲୋକଙ୍କୁ ଯେତେ ସଚେତନ କରାଗଲେ ମଧ୍ୟ ସାଇବର ଅପରାଧୀ ଦିନକୁ ଦିନ ନୂଆ ନୂଆ ଉପାୟରେ ଠକିବାରେ ଲାଗିଛନ୍ତି। ସାଇବର ଓ ଅର୍ଥନୈତିକ ଅପରାଧର ତଦନ୍ତ ତଥା ମାମଲା ପରିଚାଳନା ପାଇଁ ଭୁବନେଶ୍ୱର, କଟକ, ପୁରୀ, ବାଲେଶ୍ୱର, ରାଉରକେଲା, କେନ୍ଦୁଝର, କଳାହାଣ୍ଡି, ମୟୂରଭଞ୍ଜ, ସମ୍ବଲପୁର, ବଲାଙ୍ଗୀର, ଅନୁଗୁଳ, ବ୍ରହ୍ମପୁର, କନ୍ଧମାଳ ଓ କୋରାପୁଟରେ ସାଇବର ଥାନା ଖୋଲାଯାଇଛି। ଏହି ୧୪ଟି ସ୍ବତନ୍ତ୍ର ଥାନା ବ୍ୟତୀତ ରାଜ୍ୟର ସମସ୍ତ ଥାନାକୁ ସାଇବର ଅପରାଧର ପଞ୍ଜୀକରଣ ଓ ତଦନ୍ତ ପାଇଁ ନିର୍ଦେଶ ଦିଆଯାଇଛି। ଏଥିପାଇଁ ବିଭିନ୍ନ ଥାନାରେ ସାଇବର ସହାୟତା କକ୍ଷ ଖୋଲାଯାଇଛି ଏବଂ ଠକେଇର ଶିକାର ହେଉଥିବା ଲୋକେ ୧୯୩୦ ନମ୍ବରରେ ଫୋନ୍‍ କରି ପୁଲିସ ସହାୟତା ନେବାର ବ୍ୟବସ୍ଥା ଅଛି। ରାଜ୍ୟରେ ଗତବର୍ଷ ୧୯୮୩ଟି ସାଇବର ଅପରାଧ ମାମଲା ରୁଜୁ କରାଯାଇ ୪୪୧ଜଣଙ୍କୁ ଗିରଫ କରାଯାଇଛି। ଏହି ଘଟଣାରେ ପୁଲିସ ଠକଙ୍କଠାରୁ ପ୍ରାୟ ୨କୋଟି ଟଙ୍କା ଆଦାୟ କରି ଠକାମିର ଶିକାର ହୋଇଥିବା ଲୋକଙ୍କ ଜମାଖାତାକୁ ଫେରିଛି। ମାତ୍ର ସାଇବର ଠକେଇ ମାମଲାେର ଗିରଫ ସଂଖ୍ୟା ଆଖିଦୃଶିଆ େହଉ ନ ଥିବାବେଳେ ଦଣ୍ଡବିଧାନ ହାର ନ େହବା ସଦୃଶ। ୨୦୨୨ ଅଗଷ୍ଟ ମାସରେ ପ୍ରକାଶ ପାଇଥିବା ଜାତୀୟ କ୍ରାଇମ େରକର୍ଡ ବ୍ୟୁରୋ ତଥ୍ୟ ଅନୁସାରେ ୨୦୨୦ ଶେଷ ସୁଦ୍ଧା ଓଡ଼ିଶାରେ ୧୦୪୯ଟି ସାଇବର ଅପରାଧ ମାମଲା ବିଚାର ପ୍ରତୀକ୍ଷାରେ ଥିବାବେଳେ ୨୦୨୧ ବର୍ଷରେ ୩୧୩ଟି ମାମଲାର ବିଚାର ହୋଇନାହିଁ। ୨୦୨୧ ବର୍ଷ ବେଳକୁ ରାଜ୍ୟରେ ୧୩୬୨ଟି ସାଇବର ମାମଲା ବିଚାର ପ୍ରତୀକ୍ଷାରେ ଥିବାବେଳେ ଉକ୍ତ ବର୍ଷରେ ମାତ୍ର ଦୁଇଟି ମାମଲା ଫଇସଲା ହୋଇଥିଲା ଏବଂ ଦୁଇଟିଯାକରେ ଅଭିଯୁକ୍ତମାନେ ନିର୍ଦୋଷରେ ଖଲାସ ହୋଇଥିଲେ ।
ରାଜ୍ୟରେ ସାଇବର ଅପରାଧରେ ଦଣ୍ଡବିଧାନ ହାର ଶୂନ ପ୍ରତିଶତ ଥିବା ଏନ୍‍ସିଆର୍‍ବି ବିବରଣୀରେ ଦର୍ଶାଯାଇଛି। ବିବରଣୀ ମୁତାବକ ବର୍ଷରେ ୦.୧ ପ୍ରତିଶତ ସାଇବର ମାମଲା ଫଇସଲା ହୋଇଛି ଏବଂ ୯୯.୯ ପ୍ରତିଶତ ପୁରୁଣା ମାମଲା ପଡ଼ିରହୁଛି। ଏନ୍‍ସିଆର୍‍ବି ତଥ୍ୟ ମୁତାବକ ଜାତୀୟ ସ୍ତରରେ ଫଇସଲା ହାର ୧୩ ପ୍ରତିଶତ ଥିବାବେଳେ ଦଣ୍ଡବିଧାନ ହାର ୪୨.୫ ପ୍ରତିଶତ ରହିଛି। ୨୦୨୧ ଶେଷ ସୁଦ୍ଧା ୫୪୯୭୯ଟି ସାଇବର ମାମଲା ବିଚାର ପ୍ରତୀକ୍ଷାରେ ଥିବାବେଳେ ସେଥିରୁ ୭୧୩୯ଟି ଫଇସଲା ହୋଇଥିଲା ଏବଂ ୪୯୧ଟିରେ ଦଣ୍ଡବିଧାନ ହୋଇଥିବା ବେଳେ ୫୭୭ଟିରେ ଅଭିଯୁକ୍ତ ଖସି ଯାଇଥିଲେ। ରାଜ୍ୟରେ ସାଇବର ଠକେଇ ଅଭିଯୋଗ ବଢ଼ିବା ଫଳରେ ଅନେକ ପରିବାର ସର୍ବସ୍ୱାନ୍ତ ହେଉଛନ୍ତି। କେତେକ କ୍ଷେତ୍ରରେ ଠକଙ୍କଠାରୁ ଅର୍ଥ ଆଦାୟ ହେଉଛି। ତେବେ ଅଧିକାଂଶ କ୍ଷେତ୍ରରେ ଠକମାନେ ଖସି ଯାଉଥିବାେବଳେ ଠକେଇ ମାମଲାର ବିଚାର ବିଳମ୍ବିତ ହେଉଛି। ସାଇବର ମାମଲାର ତଦନ୍ତ ପାଇଁ ଓଡ଼ିଶା ପୁଲିସର ଆବଶ୍ୟକ ସଂଖ୍ୟକ ତାଲିମପ୍ରାପ୍ତ କର୍ମଚାରୀ ନାହାନ୍ତି କିମ୍ବା ସେପରି ଭିତ୍ତିଭୂମି ନାହିଁ ବୋଲି ପୂର୍ବତନ ବରିଷ୍ଠ ପୁଲିସ ଅଧିକାରୀ ମତ ଦେଇଛନ୍ତି।