କଟକ: ଚଳିତ ମାସ ୮ ତାରିଖରୁ ବିଦ୍ୟାଳୟ ପରିସରରେ ପରିବେଶ ସପ୍ତାହ ପାଳନ ନିମନ୍ତେ ବିଭିନ୍ନ କାର୍ଯ୍ୟକ୍ରମର ଆୟୋଜନ କରାଯାଉଛି। ପ୍ରଥମ ଦିନ ଉଦଘାଟନୀ ଉତ୍ସବରେ ବିଦ୍ୟାଳୟର ଅଧ୍ୟକ୍ଷ ଡ. ପ୍ରିୟଦର୍ଶୀ ନାୟକ ବୃକ୍ଷରୋପଣ କରି କାର୍ଯ୍ୟକ୍ରମର ଶୁଭାରମ୍ଭ କରିଥିଲେ। ଏହି ଅବସରରେ ସେ ଛାତ୍ରଛାତ୍ରୀମାନଙ୍କୁ ପରିବେଶ ସୁରକ୍ଷା ଦିଗରେ ବ୍ରତୀ ହେବା ପାଇଁ ଆହ୍ଵାନ ଦେଇଥିଲେ। ପରେ ଛାତ୍ରଛାତ୍ରୀମାନେ ଏ ସମ୍ବନ୍ଧରେ ଶପଥ ଗ୍ରହଣ କରି ରାଲିରେ ସ୍ଥାନୀୟ ଅଞ୍ଚଳ ପରିକ୍ରମା କରିଥିଲେ। ଜୈବ ବିବିଧତା ସୁରକ୍ଷାକୁ ଦୃଷ୍ଟିରେ ରଖି ଛାତ୍ରଛାତ୍ରୀଙ୍କ ଦ୍ଵାରା କାଗଜର ଥଳି ପ୍ରସ୍ତୁତ କରାଯାଇ ପଲିଥିନ ବର୍ଜନର ବାର୍ତ୍ତା ପ୍ରଦାନ କରା ଯାଇଥିଲା।
ସେହିପରି ବନ୍ୟଜନ୍ତୁ ସୁରକ୍ଷା ବିଷୟ ବସ୍ତୁ ଉପରେ ଚିତ୍ରାଙ୍କନ ପ୍ରତିଯୋଗିତାର ଆୟୋଜନ କରାଯାଇଥିଲା। ଅଦରକାରୀ ବସ୍ତୁର ବ୍ୟବହାର କରି କିଛି ନୂତନ ପଦାର୍ଥ ପ୍ରସ୍ତୁତ କରି ଛାତ୍ରଛାତ୍ରୀ ମାନେ ସେମାନଙ୍କର କଳା ନୈପୁଣ୍ୟ ପ୍ରଦର୍ଶନ କରିଥିଲେ। ରାକ୍ଷୀ ପୂର୍ଣ୍ଣିମାକୁ ଦୃଷ୍ଟିରେ ରଖି ରାକ୍ଷୀ ତିଆରି ପ୍ରତିଯୋଗିତା ମଧ୍ୟ ଆୟୋଜିତ ହୋଇଥିଲା। ବିଦ୍ୟାଳୟର କୁନି କୁନି ପିଲାଙ୍କ ଦ୍ୱାରା ମଧ୍ୟ ଚିତ୍ରାଙ୍କନ ଓ ସବୁଜ ଦିବସ ପାଳିତ ହୋଇଥିଲା। ସପ୍ତାହର ବିଶେଷ ଆକର୍ଷଣ ଥିଲା, ପିଲାମାନଙ୍କ ଏକାଗ୍ରତା ବୃଦ୍ଧି ଦିଗରେ ମାଲପାଣି ଶିଳ୍ପ ସମୂହର ଅଧ୍ୟକ୍ଷ ତଥା ଧ୍ରୁବ ଗ୍ଲୋବାଲ ବିଦ୍ୟାଳୟ ସମୂହ ପୁଣେର ନିର୍ଦ୍ଦେଶକ ଡକ୍ଟର ସଞ୍ଜୟ ମାଲପାଣିଙ୍କ ଦ୍ଵାରା ଆୟୋଜିତ କାର୍ଯ୍ୟକ୍ରମ। ଏହି କାର୍ଯ୍ୟକ୍ରମଟି ପିଲାମାନଙ୍କୁ ମାନସିକ ଭାରସାମ୍ୟ ରକ୍ଷା ଦିଗରେ ସହାୟତା ପ୍ରଦାନ କରିଥିଲା।ପରିବେଶ ସପ୍ତାହ ଆନୁକୁଲ୍ୟରେ ଆୟୋଜିତ କାର୍ଯ୍ୟକ୍ରମ ଗୁଡିକ ଅତି ଶୃଙ୍ଖଳିତ ଭାବେ ପରିଚାଳିତ ହୋଇ ପିଲାମାନଙ୍କ ଭିତରେ ପରିବେଶ ସଚେତନତା ସୃଷ୍ଟି କରିପାରିଥିଲା। ଏହି କାର୍ଯ୍ୟକ୍ରମ ଆସନ୍ତା ୧୩ ତାରିଖରେ ଉଦଯାପନ ହେବ।
