ନୂଆଦିଲ୍ଲୀ : ଶ୍ରୀଲଙ୍କା ବିପକ୍ଷ ୨ୟ ଟେଷ୍ଟ ଲାଗି ଘରୋଇ ଭାରତୀୟ ଦଳରେ ଗୋଟିଏ ପରିବର୍ତ୍ତନ କରାଯାଇଛି। ଗୁଜରାଟର ବାମହାତି ସ୍ପିନର ଅକ୍ଷର ପଟେଲଙ୍କୁ ଭାରତୀୟ ଦଳରେ ସାମିଲ କରାଯାଇଛି। ବାମହାତି ସ୍ପିନର କୁଲଦୀପ୍ ଯାଦବଙ୍କ ସ୍ଥାନରେ ଅକ୍ଷରଙ୍କୁ ଦଳରେ ସ୍ଥାନମିଳିଛି। କାନ୍ଧରେ ଆଘାତ ଓ କୋଭିଡ୍-୧୯ରେ ଆକ୍ରାନ୍ତ ହୋଇଥିବା କାରଣରୁ ଅକ୍ଷର ପଟେଲ ମୋହାଲିରେ ଖେଳା ଯାଇଥିବା ପ୍ରଥମ ଟେଷ୍ଟ ଖେଳିବାରୁ ବଞ୍ଚିତ ହୋଇଥିଲେ। ଅକ୍ଷର ଖେଳିଥିବା ପ୍ରଥମ ୫ଟି ଟେଷ୍ଟରେ ୩୬ଟି ୱିକେଟ ନେଇ ଜଣେ ମ୍ୟାଚ୍ ବିଜେତା ପ୍ରମାଣିତ ହୋଇଛନ୍ତି। ପ୍ରଥମ ଟେଷ୍ଟ ଖେଳିଥିବା ଜୟନ୍ତ ଯାଦବ ୨ଟିଯାକ ଇନିଂସକୁ ମିଶାଇ ଗୋଟିଏ ମଧ୍ୟ ୱିକେଟ ପାଇ ନଥିବାରୁ ୨ୟ ଟେଷ୍ଟରେ ଜୟନ୍ତଙ୍କୁ ଖେଳିବାର ସୁଯୋଗ ମିଳିବା ସମ୍ଭାବନା ନାହିଁ କହିଲେ ଚଳେ।
ବେଙ୍ଗାଲୁରୁରେ ମାର୍ଚ୍ଚ ୧୨ରୁ ଭାରତ-ଶ୍ରୀଲଙ୍କା ୨ୟ ଟେଷ୍ଟମ୍ୟାଚ୍ ଖେଳାଯିବ। ଏହି ମ୍ୟାଚ୍ ଦିବାରାତ୍ର ହେବ ଏବଂ ଗୋଲାପି ବଲ୍ରେ ଖେଳାଯିବ। ଏହି ମ୍ୟାଚ୍ରେ ଯଦି ଭାରତ ୩ ଜଣ ସ୍ପିନରଙ୍କୁ ନେଇ ଖେଳିବାର ନିଷ୍ପତ୍ତି ନିଏ; ତେବେ ଚୂଡ଼ାନ୍ତ ଏକାଦଶରେ ଜୟନ୍ତ ଯାଦବଙ୍କ ସ୍ଥାନରେ ଅକ୍ଷର ପଟେଲ ଖେଳିବା ନିଶ୍ଚିତ। ଶେଷଥର ଭାରତ ଅହମ୍ମଦାବାଦରେ ଦିବାରାତ୍ର ଟେଷ୍ଟମ୍ୟାଚ୍ ଖେଳିଥିଲା। ଏହି ମ୍ୟାଚ୍ରେ ଅକ୍ଷର ୧୧ଟି ୱିକେଟ ନେଇ ପ୍ଲେୟର ଅଫ୍ ଦି ମ୍ୟାଚ୍ ହୋଇଥିଲେ। ଗତବର୍ଷ ଫେବୃଆରୀରେ ଇଂଲଣ୍ଡ ବିପକ୍ଷରେ କୁଲଦୀପ ଯାଦବ ଚେନ୍ନଇରେ ଶେଷଥର ପାଇଁ ଟେଷ୍ଟମ୍ୟାଚ୍ ଖେଳିଥିଲେ। ଏହି ମ୍ୟାଚ୍ରେ କୁଲଦୀପ ୨ୟ ଇନିଂସରେ ୨ଟି ୱିକେଟ ନେଇଥିଲେ। ଅକ୍ଷର ଶେଷଥର ପାଇଁ ଗତବର୍ଷ ଡିସେମ୍ବରେର ମୁମ୍ବଇରେ ନ୍ୟୁଜିଲାଣ୍ଡ ବିପକ୍ଷରେ ଟେଷ୍ଟମ୍ୟାଚ୍ ଖେଳିଥିଲେ।
Comments are closed.