ଭୁବନେଶ୍ବର (ବ୍ୟୁରୋ): ଓଡ଼ିଶାରେ କରୋନା ସଂକ୍ରମଣର ଶିକାର ହୋଇ ମୃତ୍ୟୁବରଣ କରିଥିବା ଏକମାତ୍ର ବ୍ୟକ୍ତିଙ୍କର ସମ୍ପର୍କୀୟମାନେ ସଂକ୍ରମିତ ହୋଇଛନ୍ତି । ସଂକ୍ରମିତ ୩ ଜଣଙ୍କ ମଧ୍ୟରୁ ଜଣେ ମହିଳା ଓ ଅନ୍ୟ ଦୁଇ ଜଣ ଶିଶୁ । ଶିଶୁଙ୍କ ମଧ୍ୟରୁ ଜଣକର ବୟସ ୫ ବର୍ଷ ଓ ଅନ୍ୟ ଜଣଙ୍କର ବୟସ ୯ ବର୍ଷ । ଭୁବନେଶ୍ବର ମହାନଗର ନିଗମ ଅନ୍ତର୍ଗତ ଝାରପଡ଼ାରେ ସେମାନଙ୍କ ଘର ଏବଂ ସେମାନଙ୍କୁ ଏବେ ଏକାନ୍ତବାସରେ ରଖାଯାଇଛି । ରାଜ୍ୟ ସୂଚନା ଓ ଲୋକସମ୍ପର୍କ ବିଭାଗ ପକ୍ଷରୁ ମିଳିଛି ଏହି ସୂଚନା ।
ଏପ୍ରିଲ ୪ ତାରିଖରେ ଶ୍ବାସକ୍ରିୟାରେ ସମସ୍ୟା ଦେଖା ଦେବାରୁ ଏମ୍ସରେ ଭର୍ତି ହୋଇଥିବା ଓ ଏହାର ପରଦିନ ମୃତ୍ୟୁବରଣ କରିଥିବା ବୃଦ୍ଧଙ୍କୁ କରୋନା ହୋଇଥିବା ପରେ ଜଣା ପଡ଼ିଥିଲା। ଏମ୍ସ କର୍ତ୍ତୃପକ୍ଷ ଏନେଇ ରାଜ୍ୟ ସ୍ୱାସ୍ଥ୍ୟ ବିଭାଗକୁ ଅବଗତ କରାଇଥିଲେ। ତା’ପରେ ସ୍ୱାସ୍ଥ୍ୟ ବିଭାଗ ପୁଣି ଥରେ ଆର୍ଏମ୍ସିରେ ତାଙ୍କର ରକ୍ତ ଓ ସ୍ୱାବ୍ ଟେଷ୍ଟ କରିଥିଲା । ପରୀକ୍ଷା ରିପୋର୍ଟରେ ତାଙ୍କୁ ‘କରୋନା’ ହୋଇଥିବା ସ୍ପଷ୍ଟ ହୋଇଥିଲା। ଏହା ପରେ ସ୍ୱାସ୍ଥ୍ୟ ବିଭାଗ ମୃତକଙ୍କ ସମ୍ପର୍କୀୟଙ୍କୁ ଆଣି ସଙ୍ଗରୋଧ କରି ରଖିଥିଲେ । ମାତ୍ର ୯ ତାରିଖ ବିଳମ୍ବିତ ରାତିରେ ଆସିଥିବା ରିପୋର୍ଟରେ ଦୁଇ ଶିଶୁ ତାଙ୍କର ଜଣେ ସମ୍ପର୍କୀୟା କରୋନା ଆକ୍ରାନ୍ତ ହୋଇଥିବା ଜଣାପଡ଼ିଥିଲା ।
