ମୁଖ୍ୟମନ୍ତ୍ରୀଙ୍କ ଦିଲ୍ଲୀ ଗସ୍ତ ; କେନ୍ଦ୍ରୀୟ ଯୋଜନାରେ ବକେୟା ଅର୍ଥ ଉପଲବ୍ଧ ନେଇ କରିବେ ସମୀକ୍ଷା
ଭୁବନେଶ୍ୱର : ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରବିବାର ଅପରାହ୍ଣରେ ନୂଆଦିଲ୍ଲୀ ଗସ୍ତ କରିଛନ୍ତି। ଓଡ଼ିଶା ଭବନରେ ଆୟୋଜିତ ଏକ ଉଚ୍ଚସ୍ତରୀୟ ସମୀକ୍ଷା ବୈଠକରେ ବିଭିନ୍ନ କେନ୍ଦ୍ରୀୟ ଯୋଜନାରେ ଓଡ଼ିଶାକୁ ମିଳିବାକୁ ଥିବା ପାଣ୍ଠି କିଭଳି ଶୀଘ୍ର ଉପଲବ୍ଧ ହେବ ସେ ନେଇ ସେ ସମୀକ୍ଷା କରିବେ।
୨୦୧୮-୧୯ ଆର୍ଥିକବର୍ଷ ଶେଷ ହେବାକୁ ଯାଉଥିବାରୁ ଏହା ସରିବା ଆଗରୁ ଯେପରି ବକେୟା ଅର୍ଥ ମିଳିବ ତା ଉପରେ ସେ ବୈଠକରେ ଗୁରୁତ୍ବ ପ୍ରଦାନ କରିବେ।
ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଜାରି ଏକ ପ୍ରେସ ବିବୃତିରେ ଏହି ସୂଚନା ଦିଆଯାଇଛି। ମୁଖ୍ୟମନ୍ତ୍ରୀ ଏହି ସମୀକ୍ଷା ବୈଠକରେ କେନ୍ଦ୍ର ସରକାରଙ୍କ ବିଭିନ୍ନ ବିଭାଗରେ ପଡ଼ିରହିଥିବା କାର୍ଯ୍ୟ ସମ୍ପର୍କରେ ଆଲୋଚନା କରିବେ। ସେସବୁକୁ ତ୍ବରାନ୍ବିତ କରିବା ନେଇ ସେ ରାଜ୍ୟ ସରକାରଙ୍କ ସଂପୃକ୍ତ ବିଭାଗର ଅଧିକାରୀମାନଙ୍କୁ ନିର୍ଦେଶ ଦେବେ। ସୂଚନାଯୋଗ୍ୟ ଯେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ରବିବାର ପୂର୍ବାହ୍ନରେ ଗଞ୍ଜାମ ଜିଲା ଗସ୍ତ କରିଥିଲେ। ସେଠାରୁ ଫେରି ଅପରାହ୍ଣରେ ନୂଆଦିଲ୍ଲୀ ଯାଇଛନ୍ତି। ସେ ସୋମବାର ରାତିରେ ଭୁବନେଶ୍ବର ଫେରିବେ ବୋଲି ଏହି ସୂତ୍ରରୁ ଜଣାଯାଇଛି।