ଚୌଦ୍ୱାର: ରାଜ୍ୟରେ ମୈସୁମୀ ବର୍ଷା ଆରମ୍ଭ ହୋଇଥିବା ବେଳେ ଆଜି ଅପରାହ୍ନରେ ଚୌଦ୍ୱାରରେ ଭଲ ବର୍ଷା ହେବା ଫଳରେ ପୌରପାଳିକାର ତଳିଆ ଅଂଚଳରେ ବର୍ଷାଜଳ ରାସ୍ତାରେ ଲହଡି ମାରୁଥିବା ଦେଖିବାକୁ ମିଳିଛି । ବିଶେଷକରି ପୌରପାଳିକାର ୧୭ନଂ ୱାର୍ଡ ନୂଆସାହି ଅଂଚଳରେ ବିଭିନ୍ନ ସ୍ଥାନରେ ବର୍ଷାଜଳ ନିଷ୍କାସନ ହୋଇନପାରି ସାହିବସ୍ତିରେ ରାସ୍ତା ଉପରେ ପାଣି ଚାଲୁଥିବା ଦେଖିବାକୁ ମିଳିଥିଲା । ଏହି ୱାର୍ଡର ମୁଖ୍ୟ ପ୍ରବେଶ ପଥରେ ଥିବା ଡ୍ରେନ ମୁହଁଟି ବନ୍ଦ ହୋଇଯାଇଥିବା ହେତୁ ବର୍ଷାଜଳ ନିଷ୍କାସନ ହୋଇନପାରି ନିକଟସ୍ଥ ଦଳିତ ବସ୍ତିରେ ପ୍ରବେଶ କରିଥିଲା ।
ୱାର୍ଡରେ ଥିବା ଅନ୍ୟ ଡ୍ରେନ ଗୁଡିକ ଦୀର୍ଘଦିନ ଧରି ସଫା ହୋଇ ନଥିବାରୁ ଡ୍ରେନର ବର୍ଜ୍ୟପାଣି ବର୍ଷା ପାଣି ସହିତ ମିଶି ରାସ୍ତା ଉପରେ ଚାଲିଥିଲା । ଫଳରେ ଯାତାୟାତରେ ବାଧା ଉପୁଜିବା ସହିତ ସ୍ଥାନୀୟ ଲୋକେ ନାହିଁନଥିବା ଅସୁବିଧାର ସମ୍ମୁଖୀନ ହୋଇଥିଲେ । ବର୍ଷା ଆରମ୍ଭରୁ ଯଦି ଏପରି ପରିସ୍ଥିତି ସୃଷ୍ଟି ହୁଏ ତାହାହେଲେ ଲଗାଣ ବର୍ଷାରେ ପରିସ୍ଥିତି କଣ ହେବ ବୋଲି ସ୍ଥାନୀୟ ଅଧିବାସୀ ମାନେ ପ୍ରଶ୍ନ କରିଛନ୍ତି । ପୌର ପ୍ରଶାସନ ତୁରନ୍ତ ଏଦିଗରେ ବିହିତ ପଦକ୍ଷେପ ଗ୍ରହଣ କରିବା ପାଇଁ ୱାର୍ଡବାସୀଙ୍କ ତରଫରୁ ଦାବି ହେଉଛି ।
Comments are closed.