କଲମପୁର – କଳାହାଣ୍ଡି ଜିଲ୍ଲାର ଅଧିଷ୍ଟାତ୍ରୀ ଦେବୀ ମାଣିକେଶ୍ୱରୀଙ୍କ ଅନ୍ୟ ଏକ ପୀଠ ଥୁଆମୁଳ ରାମପୁର । ଏହି ଶକ୍ତି ପୀଠରେ ସୋମବାର ମହା ସମାରୋହର ସହିତ ଦଶହରା ଏବଂ ଛତର ଯାତ୍ରା ପାଳିତ ହେଇଯାଇଛି । ରବିବାର ଦିନ ସକାଳୁ ବ୍ରାହ୍ମଣ ପୂଜକ ମନ୍ତ୍ରୋକ୍ତିରେ ଦେବୀଙ୍କ ପୂଜା ପାଠ ପରେ କ୍ଷତ୍ରୀୟ ପୂଜକଙ୍କ ଦ୍ୱାରା ତନ୍ତ୍ରୋକ୍ତି ଓ ଯନ୍ତ୍ରୋକ୍ତି ବିଦ୍ଧିରେ ପୂଜା କରାଯାଇଥିଲା । ବହୁ ମାନସୀକ ଧାରୀ ନିଜ ନିଜ ମାନସୀକ ପୁରଣ ହେତୁ ମନ୍ଦିର ପରିସରରେ ବଳି ଦେଇଥିଲେ ।
ଏହାପରେ ଦେବୀଙ୍କ ମନ୍ଦିର ସର୍ବ ସାଧାରଣ ଦର୍ଶନ ପାଇଁ ବନ୍ଦ କରାଯାଇ ମାର୍ଜନା କରାଯାଇଥିଲା । ପୁନଃ ସଂଧ୍ୟା ଆଳତୀ ସହ ଦେବୀଙ୍କ ମନ୍ଦିର ଖୋଲାଯାଇ ଥିଲା ସର୍ବ ସାଧାରଣଙ୍କ ଦର୍ଶନ ପାଇଁ । ଏହାପରେ ବିଭିନ୍ନ ପୂଜା ଚଣ୍ଡିପାଠ ସହ ନିଶି ପୂଜା, ମହାପୂଜା ଓ ମହାବଳୀ ହେଇଥିଲା । ଏହାପରେ ଛତ୍ର ବାହାକ ଦେବୀଙ୍କ ଚଳନ୍ତି ପ୍ରତୀମା ଛତର ଧରି ଜେନାଖାଲ ଅଭିମୁଖେଯାଇଥିଲେ । ସେଠାରେ ବିଭିନ୍ନ ରିତିନିତୀ ଅନୁସାରେ ପୂଜା ପାଠ ହେବା ପରେ ଦେବୀଙ୍କ ବିଜୟ ଯାତ୍ରା ଆୟୋଜିତ ହେଇଥିଲା ।
ଦେବୀଙ୍କ ଛତ୍ର ମନ୍ଦିର ଅଭିମୁଖେ ପ୍ରତ୍ୟାବର୍ତନ କରିଥିଲେ । ଏହାପରେ ପୂର୍ବ ନିର୍ଦ୍ଧାରିତ ଯୋଗ ଅନୁସାରେ ଅଷ୍ଟମୀ ଓ ନବମୀର ସଂଯୋଗ ସମୟରେ ସନ୍ଧି ପୂଜା ପରେ ଦେବୀ ନିଜ ପୀଠରେ ବିରାଜମାନ କରିଥିଲେ । ପୂଜା କମିଟି ତରଫରୁ ଲୋକଙ୍କ ମନୋରଞ୍ଜନ ପାଇଁ ପ୍ରତ୍ୟହ ସାଂସ୍କୃତିକ କାର୍ଯ୍ୟମାନ ଆୟୋଜନ କରାଯାଇଥିଲା । ନବରଙ୍ଗପୁର, ରାୟଗଡା, ଛତିଶଗଡ (ବସ୍ତର ଅଂଚଳ)ର ଲୋକଙ୍କ ସମାଗମ ହେଇଥିଲା । ଶାନ୍ତି ଶୃଙ୍ଖଳାର ସହିତ ଏହି ଛତର ଯାତ୍ରା ସମ୍ପାଦିତ ହେଇଯାଇଛି ।
