ଭୁବନେଶ୍ୱର: କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଜେରା କରୁଛି ପ୍ରବର୍ତ୍ତନ ନିର୍ଦେଶାଳୟ । ନ୍ୟାସନାଲ ହେରାଲ୍ଡ ମାମଲାରେ ଆଜି ଦିଲ୍ଲୀରେ ରାହୁଲଙ୍କୁ ଜେରା କରାଯାଉଥିବା ବେଳେ ଏପଟେ ଭୁବନେଶ୍ୱରର ଇଡି କାର୍ଯ୍ୟାଳୟ ସମ୍ମୁଖରେ ଲାଗିଛି କଂଗ୍ରେସ ନେତାଙ୍କ ଗହଳି । ପିସିସି ସଭାପତି ଶରତ ପଟ୍ଟନାୟକଙ୍କ ନେତୃତ୍ୱରେ ପ୍ରାୟ କଂଗ୍ରେସର ସମସ୍ତ ନେତା ଓ କର୍ମୀ ଇଡି କାର୍ଯ୍ୟାଳୟ ସମ୍ମୁଖରେ ବିକ୍ଷୋପ ପ୍ରଦର୍ଶନ କରିବା ସହ ରାହୁଲଙ୍କୁ ଜେରା କରାଯିବା ଘଟଣାକୁ ବିରୋଧ କରିଛନ୍ତି ।
ତାହା ସହିତ କେନ୍ଦ୍ରରେ ବିଜେପି ସରକାର ଆକ୍ରୋଶ ମୂଳକ ଭାବେ ଏପରି କାର୍ଯ୍ୟାନୁଷ୍ଠାନ ନେଇଥିବା କହିଛନ୍ତି ପିସିସି ସଭାପତି ଶରତ ପଟ୍ଟନାୟକ । ବିଜେପି କେବଳ ରାଜନୈତକ ଅଭିଳାଷକୁ ଦୃଷ୍ଟିରେ ରଖି ଏପରି ଚକ୍ରାନ୍ତ କରୁଥିବା କଂଗ୍ରେସ ଅଭିଯୋଗ ଆଣିଛି । ଗାନ୍ଧୀ ପରିବାର ଏହାକୁ ଡରୁନାହିଁ । ଏପରି କାର୍ଯ୍ୟରେ କଂଗ୍ରେସ ବିକ୍ଷୋଭ ଜାରି ରଖିବ ବୋଲି ପିସିସି ସଭାପତି କହିଛନ୍ତି । ସେହିପରି ଏହି ବିକ୍ଷୋଭରେ ପୂର୍ବତନ ପିସିସି ସଭାପତି ନିରଞ୍ଜନ ପଟ୍ଟନାୟକ, ବିଧାୟକ ସୁରେଶ ରାଉତରାୟ ଓ ଅନ୍ୟ କଂଗ୍ରେସର ନେତା ଓ କର୍ମୀ ମାନେ ସାମିଲ ହେବା ସହ ନିଜର ପ୍ରତିକ୍ରିୟା ରଖିଥିଲେ ।
ସେପଟେ ଘଟଣାକୁ ମଧ୍ୟ ଦିଲ୍ଲୀରେ କଂଗ୍ରେସ ପକ୍ଷରୁ ବିରୋଧ କରାଯାଇଛି । ରାହୁଲଙ୍କ ସମର୍ଥନଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ଦେଖିବାକୁ ମିଳିଛି । ଦିଲ୍ଲୀରେ କଂଗ୍ରେସ କର୍ମୀମାନେ ନାରାବାଜି ଦେବା ସହ ଏଆଇସିସି ମୁଖ୍ୟାଳୟ ଆଗରେ ବିକ୍ଷୋଭ ପ୍ରଦର୍ଶନ ମଧ୍ୟ କରିଛନ୍ତି । ଘଟଣାକୁ ଦୃଷ୍ଟିରେ ରଖି ଶତାଧିକ କଂଗ୍ରେସ କର୍ମୀଙ୍କୁ ଦିଲ୍ଲୀ ପୁଲିସ ଅଟକ ରଖିଛି ।
ସୂଚନା ଥାଉକି, ଗତ ୩ ତାରିଖରେ ନେସନାଲ ହେରାଲ୍ଡ ମାମଲାରେ ପ୍ରବର୍ତ୍ତନ ନିର୍ଦେଶାଳୟ ବା (ଇଡି) ରାହୁଲଙ୍କୁ ସମନ କରିଥିଲା । ପୂର୍ବରୁ ମଧ୍ୟ ଏହି ମାମଲାରେ ଇଡି ଗୋଟିଏ ଥର ସମନ କରିସାରିଥିବା ବେଳେ ଏହା ଥିଲା ଇଡିର ଦ୍ବିତୀୟ ଥର ପାଇଁ ସମନ । ସମନ ଅନୁଯାୟୀ ଜୁନ୍ ୧୩ ତାରିଖ ଅର୍ଥାତ୍ ଆଜି ପ୍ରବର୍ତ୍ତନ ନିର୍ଦେଶାଳୟ କାର୍ଯ୍ୟାଳୟରେ ହାଜର ହେବା ପାଇଁ ତାଙ୍କୁ କୁହାଯାଇଥିଲା । ଏହା ପୂର୍ବରୁ ଜୁନ୍ ୨ ତାରିଖରେ ଇଡି ରାହୁଲଙ୍କୁ ଡକାଇଥିଲା । ହେଲେ ରାହୁଲ ବିଦେଶରେ ଥିବା ଦର୍ଶାଇ ହାଜର ହୋଇନଥିଲେ । ଏହି ମାମଲାରେ ସୋନିଆଙ୍କୁ ମଧ୍ୟ ସମନ ହୋଇଛି । ହେଲେ ତାଙ୍କର ସ୍ୱାସ୍ଥାବସ୍ଥା ଖରାପ ଥିବାରୁ ସେ ୩ ସପ୍ତାହ ଇଡିକୁ ସମୟ ମାଗିଛନ୍ତି । ଆଜି ରାହୁଲ ପ୍ରବର୍ତ୍ତନ ନିର୍ଦେଶାଳୟ କାର୍ଯ୍ୟାଳୟରେ ହାଜର ହୋଇଛନ୍ତି ।
