ପୁଣି ଉପସ୍ଥିତି ଜାହିର କଲେ ଲାଲବାହିନୀ; ଶଗଡ଼ାରେ ମାଓ ପୋଷ୍ଟର ଠାବ

ଭବାନୀପାଟଣା: କଳାହାଣ୍ଡି ଜିଲ୍ଲାର ବିଭିନ୍ନ ଅଞ୍ଚଳରେ ପୋଷ୍ଟର ଓ ରାସ୍ତା ଅବରୋଧ କରି ନିଜର ଉପସ୍ଥିତି ଜାହିର କରିଛି ଲାଲ ବାହିନୀ। ସୋମବାର ରାତିରେ କଳାହାଣ୍ଡି ଜିଲ୍ଲା ସଦରମହକୁମା ଭବାନୀପାଟଣାଠାରୁ ମାତ୍ର ୧୦ କିଲୋମିଟର ଦୂର ଭବାନୀପାଟଣା-ଥୁଆମୂଲରାମପୁର ମୁଖ୍ୟ ରାସ୍ତାର ଶଗଡା ପଞ୍ଚାୟତ ଅଫିସ ସହିତ ଶଗଡାର ବିଭିନ୍ନ ସ୍ଥାନରେ ମାଓବାଦୀମାନେ ପୋଷ୍ଟର ଓ ବ୍ୟାନର ଲଗାଇ ନିଜର ଉପସ୍ଥିତ ଜାହିର କରିଛନ୍ତି। ଫଳରେ ଭବାନୀପାଟଣା-ଥୁଆମୂଳରାମପୁର ରାସ୍ତାରେ ଦୀର୍ଘ ସମୟ ଧରି ଯାତାୟାତ ବନ୍ଦ ରହିଥିଲା। ଖବର ପାଇ ନିଜେ ଏସପି ଅଭିଳାଷ ଜୀଙ୍କ ସମେତ ଅନ୍ୟ ପୁଲିସ ଅଧିକାରୀ ଓ ଡିଭିଏଫ୍ ଯବାନ, ବମ୍ ସ୍କ୍ବାଡ୍‌ ଘଟଣାସ୍ଥଳରେ ପହଞ୍ଚି ପୋଷ୍ଟରଗୁଡିକୁ ଜବତ କରିବା ସହିତ ଅନ୍ୟାନ୍ୟ ସ୍ଥାନକୁ ଯାଞ୍ଚ କରିବା ପରେ ଭବାନୀପାଟଣା-ଥୁଆମୂଳରାମପୁର ରାସ୍ତାର ଯାତାୟାତ ସ୍ୱାଭାବିକ ହୋଇଛି।

ସେଠାରେ ଲଗାଯାଇଥିବା ବ୍ୟାନର ଓ ପୋଷ୍ଟରରେ ଉଲ୍ଲେଖ କରାଯାଇଛି ଯେ, ଆସନ୍ତା ୨୮ ତାରିଖରୁ ଅଗଷ୍ଟ ୩ ତାରିଖ ପର୍ଯ୍ୟନ୍ତ ଆରମ୍ଭ ହେଉଥିବା ଶହୀଦ ଦିବସକୁ ସଫଳ କରିବା ପାଇଁ ଜନସାଧାରଣଙ୍କୁ ଆହ୍ୱାନ ଦେଇଛନ୍ତି। ମାଓବାଦୀମାନେ ସୋମବାର ରାତିରେ ଭବାନୀପାଟଣା-ଥୁଆମୂଲରାମପୁର ମୁଖ୍ୟ ରାସ୍ତାର ଶଗଡା ପଞ୍ଚାୟତ କାର୍ଯ୍ୟାଳୟ ସମେତ ରାସ୍ତା, ଦୋକାନ ଓ ବିଭିନ୍ନ ଘରର କାନ୍ଥ ଓ ଗଛରେ ପୋଷ୍ଟର ମାରିବା ସହିତ ପଞ୍ଚାୟତ କାର୍ଯ୍ୟାଳୟ ସମ୍ମୁଖରେ ଡାଲଗୁମା ଯାଇଥିବା ରାସ୍ତାର ଛକରେ ଥିବା ଏକ ବରଗଛ ନିକଟରେ ମାଓବାଦୀମାନେ ଲ୍ୟାଣ୍ଡମାଇନ ଖଞ୍ଜି ଥିବା ଗ୍ରାମବାସୀମାନେ ସନ୍ଦେହ କରିଥିଲେ। ସେଠାରେ ବିଜିଏନ୍ ଡିଭିଜନ କମିଟି, ସିପିଆଇ (ମାଓବାଦୀ) ଦ୍ୱାରା ଲଗାଯାଇଥିବା ପୋଷ୍ଟର ଓ ବ୍ୟାନର ଲଗାଇଥିବା ଜଣାପଡିଛି।