ଭଦ୍ରକ: ବନ୍ଦ ଘର ଭିତରୁ ମହିଳାଙ୍କ କ୍ଷତାକ୍ତ ମୃତଦେହ ଉଦ୍ଧାର ହୋଇଛି। ଭଦ୍ରକ ଟାଉନ ଥାନା ଅପର୍ତ୍ତିବିନ୍ଧା ନିଉ କଲୋନୀର ବନ୍ଦ ଘରୁ ଜଣେ ମହିଳାଙ୍କ କ୍ଷତାକ୍ତ ଅବସ୍ଥାରେ ମୃତଦେହ ଉଦ୍ଧାର କରାଯାଇଛି। ମହିଳାଙ୍କ ସ୍ବାମୀ ହାଇଦ୍ରାବାଦରେ ରହୁଥିଲେ ଏବଂ ସେ ଘରେ ଏକା ରହୁଥିଲେ। କିଛି ଦିନ ହେଲା ସ୍ତ୍ରୀ ଫୋନ ରିସିଭ ନ କରିବାରୁ ସ୍ବାମୀଙ୍କ ସନ୍ଦେହ ହୋଇଥିଲା। ପାଖଆଖ ଲୋକଙ୍କୁ କ’ଣ ପାଇଁ ତାଙ୍କ ସ୍ତ୍ରୀ ଫୋନ ରିସିଭ କରୁନାହାନ୍ତି ଜାଣିବା ପାଇଁ ଯୋଗାଯୋଗ କରିଥିଲେ।
ପାଖ ଲୋକେ ତାଙ୍କ ଘରୁ ଦୁର୍ଗନ୍ଧ ବାହାରୁ ଥିବା କହିବାରୁ ସେ ତୁରନ୍ତ ଆସିଲେ। ତାଲା ଭାଙ୍ଗି କ୍ଷତାକ୍ତ ଅବସ୍ଥାରେ ମହିଳାଙ୍କ ମୃତଦେହ ବାହାର କରିବା ପରେ ଭଦ୍ରକ ଟାଉନ ଥାନା ପୁଲିସ ଓ ସାଇଣ୍ଟିଫିକ ଟିମ ଛାନଭିନ ଆରମ୍ଭ କରିଛି। କେହି ଦୁର୍ବୁତ୍ତ ଯୋଜନାବଦ୍ଧ ଭାବେ ମହିଳାଙ୍କୁ ହତ୍ୟା କରିଥିବା ସନ୍ଦେହ କରାଯାଉଛି। ତେବେ ୧୪ ଦିନ ଧରି ମହିଳାଙ୍କ ମୃତଦେହ ଘରେ ପଡ଼ି ରହିଥିବା ସୂଚନା ମିଳୁଛି। ତେବେ ପୁରା ଘଟଣା କ’ଣ ପୁଲିସ ତଦନ୍ତ ପରେ ଜଣାପଡ଼ିବ ବୋଲି ସୂଚନା ଦିଆଯାଇଛି।
