ତିହିଡ଼ି : ଭଦ୍ରକ ଜିଲା ତିହିଡ଼ି ଥାନା ଅଧୀନ ବାରସର ପଞ୍ଚାୟତ ଭଉଁରିଆବାଙ୍କ ଗ୍ରାମରେ ବାପା ଓ ସାବତ ମାଆ ମିଶି ସେମାନଙ୍କ ନାବାଳିକା ଝିଅର ତଣ୍ଟି ଚିପି ମାରି ଦେଇଥିବା ଅଭିଯୋଗ ହୋଇଛି। ତିହିଡ଼ି ପୁଲିସ ନାବାଳିକାର ବାପା ବାବାଜୀ ଓ ସାବତ ମା’ ବାସନ୍ତୀଙ୍କୁ ଗିରଫ ତଦନ୍ତ ଜାରି ରଖିଛି। ମୃତ ନାବାଳିକାର ନାଁ ଟେରି ବାରିକ। ଟେରିର ସାନବାପା ପ୍ରଭାକର ତିହିଡ଼ି ଥାନାରେ ଗତକାଲି ରାତି ପ୍ରାୟ ଦୁଇଟାରେ ପହଞ୍ଚି ଏ ସମ୍ପର୍କରେ ଲିଖିତ ଅଭିଯୋଗ କରିଥିଲେ। ବାବାଜୀ ଓ ବାସନ୍ତୀ ବୁଧବାର ଅପରାହ୍ଣ ୩ଟାରେ ଗୋରୁକୁ ତୋରାଣୀ ଦେବା ଲାଗି ଝିଅ ଟେରିକୁ କହିଥିଲେ। ଟେରି ତୋରାଣୀ ନଦେବାରୁ ଉଭୟ ବାବାଜୀ ଓ ବାସନ୍ତୀ ତା’ ବେକ ଉପରେ ଚଢ଼ି ଯାଇଥିଲେ। ଟେରି ଗୁରୁତର ହେବାରୁ ତାକୁ ତିହିଡ଼ି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିଲା। ସେଠାରୁ ନେଇ ଭଦ୍ରକ ଜିଲା ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ତେବେ ଚିକିତ୍ସାଧୀନ ଅବସ୍ଥାରେ ଟେରିର ମୃତ୍ୟୁ ହୋଇଯାଇଥିଲା। ଅଭିଯୋଗ ପାଇ ତିହିଡ଼ି ପୁଲିସ ଭଦ୍ରକ ଡାକ୍ତରଖାନାରେ ପହଞ୍ଚି ସେଠାରେ ଝିଅ ପାଖରେ ଥିବା ବାପ ବାବାଜୀ ଓ ସାବତ ମା’ ବାସନ୍ତୀକୁ ଗିରଫ କରି ତିହିଡ଼ି ନେଇ ଆସିଥିଲେ। ସୂଚନା ଯୋଗ୍ୟ, ବାବାଜୀଙ୍କ ଆଗ ସ୍ତ୍ରୀର ଦୁଇ ପୁଅ ଓ ଦୁଇ ଝିଅଙ୍କ ମଧ୍ୟରୁ ଟେରି ସାନ ଥିଲା। ସେହିପରି ଟେରିର ସାବତ ମା’ଠାରୁ ମଧ୍ୟ ଅନ୍ୟ ଦୁଇଜଣ ପିଲା ଅଛନ୍ତି। ଏ ସମ୍ପର୍କରେ ଅଭିଯୁକ୍ତ ବାବାଜୀଙ୍କୁ ପଚାରିବାରୁ ରାଗରେ ଝିଅ ଟେରିକୁ ଚାପଡ଼ଟେ ମାରିବାରୁ ସେ ଅସୁସ୍ଥ ହୋଇପଡ଼ିଥିଲା ବୋଲି କହିଥିବା ବେଳେ ବାସନ୍ତୀ ତଣ୍ଟି ଚିପିବା କଥାକୁ ଅସ୍ୱୀକାର କରିଛନ୍ତି।
