ରେଙ୍ଗାଲିକ୍ୟାମ୍ପ: ଅତାବିରା ବ୍ଲକ ଅନ୍ତର୍ଗତ ଟୋପ ଗ୍ରାମରେ ଗତ ଗୁରୁବାର ବିଳମ୍ବିତ ରାତିରେ କୃପାସିନ୍ଧୁ ମେହେରଙ୍କ ଘରୁ ୬ ଭରି ସୁନା ଅଳଙ୍କାର ଓ ୨୫୦୦ ଟଙ୍କା ଚୋରି ହୋଇଛି। ରାତି ପ୍ରାୟ ୧୧ ଟାରେ କୃପାସିନ୍ଧୁଙ୍କ ସମେତ ତାଙ୍କ ପରିବାରର ସମସ୍ତେ ଖାଇ ପିଇ ଶୋଇଥିଲେ। ଠିକ୍ ରାତି ୩ଟା ବେଳେ କୃପାସିନ୍ଧୁଙ୍କ ବଡ଼ ଭାଇ ବାହାରକୁ ଆସିଥିଲେ। ଏହି ସମୟରେ ରୋଷେଇ ଘର ଉପରେ ତାଙ୍କ ନଜର ପଡ଼ିଥିଲା। ରୋଷେଇ ଘର ଖୋଲା ଥିବାବେଳେ ଅନ୍ୟମାନଙ୍କ ଶୋଇବା ଘର ବାହାରପଟୁ ବନ୍ଦ ରହିଥିଲା। ସେ ରୋଷେଇ ଘରକୁ ଯାଇ ଦେଖିବାରୁ ସେଠାରେ ଥିବା ଆଲମିରା ଖୋଲା ଥିଲା ଓ ଜିନିଷ ପତ୍ର ଏପଟ ସେପଟ ହୋଇପଡ଼ିଥିଲା। ଏହା ଦେଖି ସେ ସମସ୍ତଙ୍କୁ ଡାକିଥିଲେ।ଉକ୍ତ ଆଲମିରାରେ ଥିବା କୃପାସିନ୍ଧୁଙ୍କ ୬ ଭରି ସୁନା ଓ ନଗଦ ୨୫୦୦ ଟଙ୍କା ନ ଥିଲା। ଏହା ସହ ତଳ ମହଲାରେ ଥିବା ରୁମ୍ଗୁଡିକରେ ଜିନିଷପତ୍ର ସବୁ ଏପଟ ସେପଟ ଫିଙ୍ଗା ଫିଙ୍ଗି ହୋଇପଡ଼ିଥିଲା। ଏ ନେଇ ଅତାବିରା ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ପୁଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। ସମ୍ବଲପୁରରୁ ସାଇଣ୍ଟିଫିକ ଟିମ୍ ସନ୍ଧାନୀ କୁକୁର ସହାୟତାରେ ତଦନ୍ତ କରିଛନ୍ତି। କିନ୍ତୁ ଅଭିଯୁକ୍ତ ଧରାପଡ଼ିନାହିଁ।
Comments are closed.