ସାଧାରଣତଃ ଆମ ସମସ୍ତଙ୍କ ଘରେ ତେଜପତ୍ର ନିଶ୍ଚିତ ଉପଲବ୍ଧ। ଏହାକୁ ବିଶେଷ ଭାବେ ଖାଦ୍ୟ ପ୍ରସ୍ତୁତିରେ ବ୍ୟବହାର କରାଯାଇଥାଏ। ହେଲେ ଖୁବ୍ କମ୍ ଲୋକେ ଏ ବିଷୟରେ ଜାଣନ୍ତି ଯେ, ମସଲା ଭାବେ ବ୍ୟବହୃତ ହେଉଥିବା ତେଜପତ୍ର ବହୁତ ରୋଗ ଦୂର କରିବାରେ ମଧ୍ୟ ସାହାଯ୍ୟ କରିଥାଏ। ବିଶେଷ କରି ପେଟ ସମ୍ବନ୍ଧୀୟ ଅନେକ ସମସ୍ୟା ଦୂର କରିବାରେ ଏହା ଖୁବ୍ ଉପଯୋଗୀ। ତେବେ ଚାଲନ୍ତୁ ଜାଣିବା ତେଜପତ୍ର କିପରି ପେଟର ଅନେକ ସମସ୍ୟା ଦୂର କରିବାରେ ସହାୟକ ହୋଇଥାଏ –
ଖାଦ୍ୟର ସ୍ୱାଦ ସହ ତାହାର ବାସ୍ନା ବଢାଉଥିବା ତେଜପତ୍ରରେ କପର୍, ପୋଟାସିୟମ୍, କ୍ୟାଲସିୟମ୍ ଓ ଆଇରନ୍ ଭଳି ପୋଷକ ତତ୍ତ୍ବ ରହିଥାଏ। ଏହା ଖାଦ୍ୟର ସ୍ବାଦ ସହ ଆପଣଙ୍କ ପାଚନ କ୍ରିୟାକୁ ସୁସ୍ଥ ଓ ସଠିକ୍ ରଖିଥାଏ।
ତେଜପତ୍ରରୁ ଚା’ ପ୍ରସ୍ତୁତ କରି ପିଇବା ଦ୍ବାରା ଅନେକ ଲାଭ ମିଳିଥାଏ। ଏହାଦ୍ବାରା କୋଷ୍ଠକାଠିନ୍ୟ, ଏସିଡିଟି ଓ ପେଟ କାମୁଡ଼ିବା ପରି ସମସ୍ୟାରୁ ମୁକ୍ତି ମିଳିଥାଏ। ମଧୁମେହ ରୋଗୀଙ୍କ ପାଇଁ ମଧ୍ୟ ଏହା ଖୁବ୍ ଉପଯୋଗୀ। ଚା’ରେ ତେଜପତ୍ର ପକାଇ ପିଇଲେ ରକ୍ତରେ ଶର୍କରା ପରିମାଣ ନିୟନ୍ତ୍ରଣରେ ରହିଥାଏ । ଏହାର ସେବନ ହୃଦୟ ଉପରେ ମଧ୍ୟ ଭଲ ପ୍ରଭାବ ପକାଇଥାଏ।
