ଭୁବନେଶ୍ୱର: ବରମୁଣ୍ଡା ଦୁର୍ଗାପୂଜା ସମିତି ପକ୍ଷରୁ ମା ଦୁର୍ଗାଙ୍କ ପୂଜା ଚଳିତ ବର୍ଷ ୨୫ବର୍ଷରେ ପଦାର୍ପଣ କରିବ। ସେଥିପାଇଁ ଏଥର ଦର୍ଶକଙ୍କୁ ଆକୃଷ୍ଟ କରିବା ପାଇଁ ରାଜସ୍ଥାନର ଉମେଦ ଭବନ ତୋରଣ ନିର୍ମାଣ କରାଯାଉଛି। ପଶ୍ଚିମବଙ୍ଗର ପ୍ରାୟ ୪୦ କାରିଗର ତୋରଣ ନିର୍ମାଣରେ ଲାଗିଛନ୍ତି। ଏହି ତୋରଣର ଦୈର୍ଘ୍ୟ ୧୦୦ଫୁଟ୍ ଓ ଉଚ୍ଚତା ୮୦ଫୁଟ୍ ହେବ। ସେହିଭଳି ମା’ଙ୍କ ପ୍ରତିମା ୧୬ଫୁଟ ଓ ମେଢ ୨୦ଫୁଟ ହେବ। ଏହି ମଣ୍ଡପରେ ଷଷ୍ଠୀ ତିଥିରୁ କଳସ ଯାତ୍ରା ଓ ବେଲବରଣି କରି ପୂଜା ଆରମ୍ଭ ହେବ। ମହାସପ୍ତମୀରେ ମା’ଙ୍କ ଚକ୍ଷୁ ଦାନ, ସପ୍ତଶତୀ ଚଣ୍ଡିପାଠ ପରେ ଶ୍ରଦ୍ଧାଳୁ ମା’ଙ୍କୁ ଦର୍ଶନ କରିପାରିବେ। ସେହିଭଳି ମହାଷ୍ଟମୀ ଓ ମହାନବମୀରେ ମା’ଙ୍କ ସମସ୍ତ ପୂଜା ବିଧି ସହ ସନ୍ଧିପୂଜା ଓ କୁମାରୀ ପୂଜନ ହେବ। ଦର୍ଶକଙ୍କ ଭିଡ଼କୁ ଦୃଷ୍ଟିରେ ରଖି ଚୋରି, ଛିନତାଇ ରୋକିବାକୁ ମଣ୍ଡପରେ ୧୦ଟି ସିସିଟିଭି କ୍ୟାମେରା ଲଗାଯିବା ସହ ଶ୍ରଦ୍ଧାଳୁଙ୍କ ସହାୟତା ପାଇଁ ୧୦୦ଜଣ ସ୍ୱେଚ୍ଛାସେବୀ ସହଯୋଗ କରିବେ। ଚଳିତ ବର୍ଷ ପୂଜାରେ ରାବଣ ପୋଡି ଓ ମୀନା ବଜାର ଦର୍ଶକଙ୍କ ମୁଖ୍ୟ ଆକର୍ଷଣ ପାଲଟିବ।
