ମେଲବୋର୍ଣ୍ଣ: ଆସନ୍ତା ଫେବୃଆରୀ ୮ରୁ ଆରମ୍ଭ ହେବାକୁ ଥିବା ଅଷ୍ଟ୍ରେଲିଆନ୍ ଓପନ୍ ଟେନିସ୍ ଟୁର୍ଣ୍ଣାମେଣ୍ଟରେ ଭାଗ ନେବାକୁ ଥିବା ବିଭିନ୍ନ ଦେଶର ଖେଳାଳିଙ୍କୁ ଆଣିବା ପାଇଁ ସ୍ବତନ୍ତ୍ର ଚାର୍ଟର ବିମାନର ବନ୍ଦୋବସ୍ତ କରାଯାଇଥିବା ବେଳେ ଦୁଇଟି ଚାର୍ଟର ବିମାନରେ ୩ଜଣ କରୋନା ସଂକ୍ରମିତ ଚିହ୍ନଟ ହୋଇଛନ୍ତି। ଏହାକୁ ଦୃଷ୍ଟିରେ ରଖି ଏହି ଦୁଇଟି ବିମାନରେ ଯାତ୍ରା କରିଥିବା ୪୭ଜଣ ଖେଳାଳିଙ୍କୁ ହୋଟେଲ୍ରେ ସଙ୍ଗରୋଧରେ ରଖିଛନ୍ତି ଆୟୋଜକ।
ଲସ୍ ଆଞ୍ଜେଲ୍ସରୁ ୨୪ଜଣ ଖେଳାଳିଙ୍କୁ ନେଇ ଏକ ଚାର୍ଟର ବିମାନ ଅଷ୍ଟ୍ରେଲିଆ ଅଭିମୁଖେ ବାହାରି ଥିଲା। ଅଷ୍ଟ୍ରେଲିଆରେ ପହଞ୍ଚିବା ପରେ କରାଯାଇଥିବା କୋଭିଡ୍ ପରୀକ୍ଷାରୁ ବିମାନର ଜନୈକ କର୍ମଚାରୀ ଓ ଅନ୍ୟ ଜଣେ ଅଣଖେଳାଳି କରୋନା ସଂକ୍ରମିତ ହୋଇଥିବା ଜଣାପଡ଼ିଥିଲା। ସେହିପରି ଆବୁଧାବିରୁ ଅନ୍ୟ ଏକ ଚାର୍ଟର ବିମାନରେ ୨୩ଜଣ ଖେଳାଳି ଅଷ୍ଟ୍ରେଲିଆ ଆସିଥିଲେ। ଏହି ବିମାନରେ ଜଣେ ଅଣଖେଳାଳି କରୋନା ସଂକ୍ରମିତ ହୋଇଥିବା ଜଣାପଡ଼ିବା ପରେ ମୋଟ୍ ୪୭ଜଣଙ୍କୁ ସଙ୍ଗରୋଧରେ ରଖାଯାଇଛି। କରୋନା ସଂକ୍ରମିତ ୩ଜଣଙ୍କୁ ଡାକ୍ତରଖାନାକୁ ପଠାଇ ଦିଆଯାଇଛି। ଏହି ଖେଳାଳିମାନେ ୧୪ ଦିନ ସଙ୍ଗରୋଧରେ ରହିବେ। ସେମାନଙ୍କୁ ହୋଟେଲ୍ ରୁମ୍ ବାହାରକୁ ଆସିବାକୁ ଅନୁମତି ମିଳିବ ନାହିଁ ବୋଲି ଆୟୋଜକଙ୍କ ତରଫରୁ ସ୍ପଷ୍ଟ କରି ଦିଆଯାଇଛି। ସୂଚନାଥାଉକି ସଙ୍ଗରୋଧରେ ରହିବା ସମୟରେ ଖେଳାଳିମାନେ ପ୍ରତିଦିନ ୫ ଘଣ୍ଟା ହୋଟେଲ୍ ପରିସରରେ ଅଭ୍ୟାସ କରିପାରିବେ ବୋଲି ପୂର୍ବରୁ ଘୋଷଣା କରାଯାଇଥିଲା। ତେବେ ଏହି ୪୭ଜଣ ଖେଳାଳିଙ୍କୁ ସେହି ସୁବିଧା ମିଳିବ ନାହିଁ ବୋଲି ଆୟୋଜକଙ୍କ ତରଫରୁ ସ୍ପଷ୍ଟ କରି ଦିଆଯାଇଛି।
