ଆଠଗଡ; ଆଠଗଡ ଥାନା ଅନ୍ତର୍ଗତ ମହାକାଳବସ୍ତ ପଞ୍ଚାୟତ ଅଧିନ ଦହିସରା ଗ୍ରାମର ଜଣେ ନାବାଳିକାକୁ ଅସଦାଚରଣ ମାମଲାରେ ଆଠଗଡ ପୁଲିସ ପକ୍ସୋ ଆଇନ ଅନୁସାରେ ଅଭିଯୁକ୍ତକୁ ଗିରଫ କରିଥିବା ଜଣାପଡିଛି। ଥାନାରେ ପୀଡିତାଙ୍କ ବାପା ଦେଇଥିବା ଏତଲା ଆଧାରରେ ୧୫ ବର୍ଷ ବୟସ୍କା ତାଙ୍କ ନାବାଳିକା ଝିଅକୁ ସେହି ଦହିସରା ଗ୍ରାମର ଶତ୍ରୁଘ୍ନ ରାଉତଙ୍କ ପୁଅ ସନ୍ତୋଷ ରାଉତ (୨୮) ଗତ କିଛିଦିନ ହେବ ଏକ ତରଫା ପ୍ରେମ ନିବେଦନ କରିବା ସହିତ ନାନା ଅଶ୍ଳିଳ ଇଙ୍ଗିତ କରିବା ସହିତ ହଇରାଣ ହରକତ କରି ଆସୁଥିଲା ।
ତେବେ ଗତ ଶୁକ୍ରବାର ସମ୍ପୃକ୍ତ ନାବାଳିକା ନିକଟସ୍ଥ ହାଇସ୍କୁଲକୁ ପଢିବାକୁ ଯାଇଥିବାବେଳେ ଅଭିଯୁକ୍ତ ଅନ୍ୟ ଜଣେ ସହଯୋଗୀ ମାଧ୍ୟମରେ ପୀଡିତାଙ୍କୁ ତାଙ୍କ ବାପାଙ୍କର ଦୁର୍ଘଟଣା ହେଇଛି ବୋଲି ମିଛରେ କହି ସ୍କୁଲରୁ ଘରକୁ ଯିବାକୁ କହିଥିଲେ। ଝିଅଟି ବାପାଙ୍କର ଦୁର୍ଘଟଣା ହୋଇଥିବା ଶୁଣି ଘରକୁ ଯାଉଥିବାବେଳେ ସ୍କୁଲର ଅନତି ଦୂରରେ ଏକ କୁକୁଡା ଫାର୍ମ ନିକଟରେ ପୂର୍ବରୁ ଜଗି ରହିଥିବା ଅଭିଯୁକ୍ତ ସନ୍ତୋଷ ପୁଣି ପ୍ରେମ ନିବେଦନ କରିବା ସହିତ ନାବାଳିକା ପ୍ରତି ଅସଦାଚରଣ କରିଥିଲା।
ଝିଅ ସେଠାରୁ କାନ୍ଦି କାନ୍ଦି ଘରକୁ ଯାଇ ମାଆ ବାପାଙ୍କୁ ସବୁକଥା କହିବା ପରେ ତାଙ୍କ ବାପା ରବିବାର ଆଠଗଡ ଥାନାରେ ଏ ସମ୍ପର୍କରେ ଲିଖିତ ଅଭିଯୋଗ କରିଥିଲେ। ଘଟଣାର ଅନୁସନ୍ଧାନ କରି ପୁଲିସ ଅଭିଯୁକ୍ତ ସନ୍ତୋଷ ରାଉତକୁ ରବିବାର ଗିରଫ କରିଥିଲା। ପକ୍ସୋ ଆଇନ ଅନୁସାରେ ଅଭିଯୁକ୍ତକୁ ଗିରଫ କରାଯାଇଛି ଏବଂ ସୋମବାର କୋର୍ଟ ଚାଲାଣ କରାଯିବ ବୋଲି ତଦନ୍ତକାରୀ ଅଧିକାରୀ ଉପନିରୀକ୍ଷକ ଜନ୍ମିତା ସାସମଲ୍ କହିଛନ୍ତି।
Comments are closed.