ଦୁର୍ଘଟଣାରେ ୩ ମୃତ୍ୟୁକୁ ନେଇ ଉତ୍ତେଜନା ; ସ୍ଥାନୀୟ ଲୋକଙ୍କ ରାଜପଥ ଅବରୋଧ

ଅନୁଗୁଳ : ଅନୁଗୁଳ ଥାନା ଅନ୍ତର୍ଗତ କାଲଟାକ୍ସ ଛକ ନିକଟରେ ଘଟିଥିବା ଦୁର୍ଘଟଣା ମାମଲାରେ ସ୍ଥାନୀୟ ଲୋକେ ଟ୍ରକ ମାଲିକଙ୍କ କ୍ଷତିପୂରଣ ଦାବିରେ ୫୫ ନମ୍ବର ଜାତୀୟ ରାଜପଥ ଅବରୋଧ କରିଛନ୍ତି। ଦୁର୍ଘଟଣାରେ ମୃତ ୩ ଜଣଙ୍କ ଶବ ବ୍ୟବଚ୍ଛେଦ ନହୋଇ ଡାକ୍ତର ଖାନାରେ ପଡ଼ି ରହିଛି। ଦୁର୍ଘଟଣା ଘଟିବା ପରେ ଘଟଣା ସ୍ଥଳରୁ ଚାଳକ ଫେରାର ହୋଇଯାଇଥିବା ସୂଚନା ମିଳିଛି।

ଉଲ୍ଲେଖଯୋଗ୍ୟ, ବୁଧବାର ବିଳମ୍ବିତ ରାତିରେ କାଲଟାକ୍ସ ଛକ ନିକଟରେ ଏହି ମର୍ମନ୍ତୁଦ ସଡକ ଦୁର୍ଘଟଣାରେ ତିନି ଜଣଙ୍କ ମୃତ୍ୟୁ ହୋଇଥିଲା। ମୃତକମାନେ ହେଲେ ତୁରଙ୍ଗ ଗ୍ରାମର ଦୀପକ ନାଏକ, କାଳିଆ ନାଏକ ଓ ଦିଲ୍ଲୀପ ନାଏକ। ସେମାନେ ଦଣ୍ଡ ନାଚ ଦେଖି ଏକ ସ୍କୁଟିରେ ତୁରଙ୍ଗ ଗ୍ରାମକୁ ଫେରୁଥିଲେ। ସେହି ସମୟରେ କାଲଟାକ୍ସ ଛକ ନିକଟରେ ଏକ ଟ୍ରକ ସେମାନଙ୍କୁ ଧକ୍କା ଦେଇଥିଲା। ଫଳରେ ଘଟଣାସ୍ଥଳରେ ଦୁଇ ଜଣଙ୍କ ମୃତ୍ୟୁ ହୋଇ ଯାଇଥିବା ବେଳେ ଜଣେ ଗୁରୁତର ହୋଇଥିଲେ। ଗୁରୁତରଙ୍କୁ ଉଦ୍ଧାର କରି ଡାକ୍ତରଖାନା ନେଉଥିବା ବେଳେ ବାଟରେ ତାଙ୍କର ମୃତ୍ୟୁ ହୋଇଯାଇଥିଲା।