ଏଥର ଏହି ସମ୍ବେଦନଶୀଳ ଘଟଣା ଉପରୁ ପରଦା ଉଠାଇବେ ଆୟୁଷ୍ମାନ; ରିଲିଜ୍‌ ହେଲା ‘ଅନେକ’ର ଟ୍ରେଲର

ମୁମ୍ବଇ: ଲୋକପ୍ରିୟ ବଲିଉଡ଼ ଅଭିନେତା ଆୟୁଷ୍ମାନ ଖୁରାନାଙ୍କ ଆଗାମୀ ଚଳଚ୍ଚିତ୍ର ‘ଅନେକ’ର ଟ୍ରେଲର ଗୁରୁବାର ରିଲିଜ୍‌ ହୋଇଛି। ଏଥିରେ ସେ ଜଣେ ଅଣ୍ଡରକଭର୍ ପୁଲିସ ଅଧିକାରୀ ଭୂମିକାରେ ଅଭିନୟ କରିଛନ୍ତି। ଟ୍ରେଲରରେ ଅଭିନେତାଙ୍କ ଭିନ୍ନ ଅନ୍ଦାଜ ଦେଖିବାକୁ ମିଳିଛି। ଫିଲ୍ମରେ ଆୟୁଷ୍ମାନଙ୍କ ଦମ୍‌ଦାର ଅଭିନୟ ସାଙ୍ଗକୁ ଜବରଦସ୍ତ ସଂଳାପ ପୁଣି ଥରେ ଦର୍ଶକଙ୍କ ମନ ମୋହିବ। ‘ଆର୍ଟିକିଲ୍‌ ୧୫’ରେ ପୁଲିସ ସାଜିବା ପରେ ଆୟୁଷ୍ମାନ ‘ଅନେକ’ରେ ଜଣେ ଅଣ୍ଡରକଭର ପୁଲିସ ଅଧିକାରୀ ସାଜି ଉତ୍ତର ପୂର୍ବାଞ୍ଚଳ ଓ ସେଠାକାର ଲୋକଙ୍କ ସହ ହେଉଥିବା ଭେଦଭାବ ଭଳି ଗମ୍ଭୀର ସମସ୍ୟାର ସମାଧାନ କରୁଥିବା ଦେଖିବାକୁ ମିଳିବ।

ଚଳଚ୍ଚିତ୍ରର ଟ୍ରେଲରରେ ଅଭିନେତା ଅଞ୍ଚଳ ଏବଂ ଭାଷା ଆଧାରରେ ବିଭାଜିତ ଭାରତ ଉପରେ ପ୍ରଶ୍ନ ଉଠାଉଥିବା ମଧ୍ୟ ଦେଖିବାକୁ ମିଳିଛି। ଟ୍ରେଲର ଦେଖି ଜଣାପଡ଼ୁଛି ଯେ, ଏହି ଫିଲ୍ମ ମାଧ୍ୟମରେ ଅଭିନେତା ପୁଣି ଥରେ ଏକ ଗମ୍ଭୀର ପ୍ରସଙ୍ଗକୁ ଦର୍ଶକଙ୍କ ନିକଟରେ ପହଞ୍ଚାଇବାକୁ ଯାଉଛନ୍ତି। ଫିଲ୍ମରେ ଅଭିନେତାଙ୍କ ଆକ୍ସନ ଅବତାର ଦର୍ଶକଙ୍କୁ ପସନ୍ଦ ଆସୁଥିବା କମେଣ୍ଟରୁ ଜଣାପଡ଼ିଛି। ଅନୁଭବ ସିହ୍ନାଙ୍କ ଦ୍ବାରା ରଚିତ ଓ ନିର୍ଦେଶିତ ‘ଅନେକ’କୁ ଭୂଷଣ କୁମାରଙ୍କ ଟି-ସିରିଜ୍‌ ଓ ଅନୁଭବ ସିହ୍ନାଙ୍କ ବନାରସ ମିଡିଆ ୱର୍କ୍ସର ମିଳିତ ସହଯୋଗରେ ନିର୍ମାଣ କରାଯାଇଛି। ଚଳିତ ବର୍ଷ ମେ’ ୨୭ ତାରିଖରେ ଏହି ଫିଲ୍ମ ପ୍ରେକ୍ଷାଳୟକୁ ଆସିବ।