ବରଗଡ଼: ଆଜି ଏକ ମର୍ମନ୍ତୁଦ ସଡ଼କ ଦୁର୍ଘଟଣାରେ ଦୁଇଜଣ ସ୍କୁଲ୍ ଛାତ୍ରଙ୍କ ସମେତ ତିିନି ଜଣଙ୍କ ମୃତ୍ୟୁ ଘଟିଛି। ମେଳଛାମୁଣ୍ଡା ଥାନା ଅଧୀନ ପେଟୁପଲିଠାରେ ଘଟିଛି ଏହି ଦୁର୍ଘଟଣା। ଟ୍ୟୁସନ୍ରୁ ଫେରୁଥିବା ବେଳେ ଦୁଇ ଜଣ ଛାତ୍ର ଜଣେ ମୋଟରସାଇକଲ୍ ଚାଳକଙ୍କୁ ଲିଫ୍ଟ ମାଗିଥିଲେ। ଏହାପରେ ଏକ ଜେସିବି ମୋଟର ସାଇକଲ୍କୁ ଧକ୍କା ଦେଇଥିଲା। ଘଟଣାସ୍ଥଳରେ ହିଁ ବାଇକ ଚାଳକଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଦୁଇ ଜଣଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଚିକିତ୍ସାଧୀନ ଅବସ୍ଥାରେ ସେମାନଙ୍କ ମୃତ୍ୟୁ ଘଟିଥିଲା। ମୃତକମାନେ ହେଲେ ନୂଆଜାମପଲିର କୌସ୍ତୁଭ ଭୋଇ ଓ ଡୁଙ୍ଗରକେରମେଲ୍ର ସରୋଜ ପ୍ରଧାନ। ବାଇକ୍ ଚାଳକଙ୍କ ପରିଚୟ ମିଳିପାରିନାହିଁ। ଏହି ଘଟଣା ପରେ ଉତ୍ତ୍ୟକ୍ତ ଲୋକେ ଜେସିବି ପୋଡ଼ି ଦେବା ସହିତ ରାସ୍ତା ଅବରୋଧ କରିଛନ୍ତି। ସ୍ଥାନୀୟ ପୁଲିସ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରୁଛନ୍ତି।
