କଳାପଥର(ବାଙ୍କୀ): ବାଙ୍କୀ ଥାନା ଅନ୍ତର୍ଗତ ଢଂସର- ଗୋପାଳପୁର ରାସ୍ତା ମଝିରେ ସୋମବାର ସଂଧ୍ୟାରେ ହାଇୱା ଚଢିଯିବାରୁ ଘଟଣା ସ୍ଥଳରେ ଜଣେ ସାଇକଲ ଆରୋହୀଙ୍କର ମୃତ୍ୟୁ ହୋଇଯାଇଥିଲା। କ୍ଷତିପୂରଣ ଦାବିରେ ସ୍ଥାନୀୟ ଲୋକମାନେ ରାସ୍ତାରୋକ କରିଛନ୍ତି। ସ୍ଥାନୀୟ ଢଂସର ଗ୍ରାମବାସୀ ବାଙ୍କୀ-ସିମୋର ରାସ୍ତାରେ ଟାୟାର ଜାଳି, ଗଛ ପକାଇ ରାସ୍ତା ଅବରୋଧ କରିଛନ୍ତି। ଫଳରେ ଗାଡି ଚଳାଚଳ ସମ୍ପୂର୍ଣ୍ଣ ବନ୍ଦ ହୋଇଯାଇଛି। ଖବର ପାଇ ବାଙ୍କୀ ପୁଲିସ୍ ଘଟଣାସ୍ଥଳରେ ପହଞ୍ଚି ଅବରୋଧକାରୀଙ୍କୁ ବୁଝାସୁଝା କରିଛି।
ସୂଚନାଯୋଗ୍ୟ ଯେ, ସୋମବାର ସଂଧ୍ୟା ପ୍ରାୟ ୫.୩୦ ସମୟରେ ଢଂସର ଗ୍ରାମର ଦୀନବନ୍ଧୁ ସ୍ୱାଇଁ ସାଇକେଲ ଯୋଗେ ବାଙ୍କୀରୁ ନିଜ ଗ୍ରାମକୁ ଫେରୁଥିଲେ। ଏହି ସମୟରେ ଗୋପାଳପୁର -ଢଂସର ମଝିରେ ବାଙ୍କୀ ପଟୁ ଆସୁଥିବା ଏକ ହାଇୱା ପଛପଟୁ ତାଙ୍କୁ ଧକ୍କା ଦେଇଥିଲା। ଖବର ପାଇ ଢଂସର ଗ୍ରାମବାସୀ ଟ୍ରକଟିକୁ ଅଟକାଇ ଥିଲେ। ଗ୍ରାମବାସୀ ଟ୍ରକର ଡ୍ରାଇଭରକୁ ନିସ୍ତୁକ ମାଡ ମାରିଥିବା ବେଳେ ଗାଡିର କାଚ ଭାଙ୍ଗି ଦେଇଥିଲେ। ପରେ ଶତାଧିକ ଗ୍ରାମବାସୀ ଢଂସର ଠାରେ ମଙ୍ଗଳବାର ସକାଳୁ ରାସ୍ତାରେ ଟାୟାର ଜାଳି କ୍ଷତିପୂରଣ ଦାବିରେ ରାସ୍ତା ରୋକ କରିଥିବା ଜଣାପଡିଛି।
