ରିୟାଦ : ସାଉଦି ଆରବ ୨୧ ବର୍ଷରୁ ଊର୍ଦ୍ଧ୍ବ ମହିଳାଙ୍କୁ ପୁରୁଷ ଅଭିଭାବକର ଅନୁମତି ବିନା ବିଦେଶ ଯାତ୍ରା ପାଇଁ ଅନୁମତି ପ୍ରଦାନ କରିଛି। ଏଥିପାଇଁ ଶୁକ୍ରବାର ସାଉଦି ଆରବରେ ନୂଆ ନିୟମ ଅଣାଯାଇଛି।
ଏହି ନିୟମ ଅନୁସାରେ ୨୧ ବର୍ଷ ବୟସରୁ ଊର୍ଦ୍ଧ୍ବ ମହିଳାଙ୍କୁ ଆଉ ପାସପୋର୍ଟ ଓ ବିଦେଶ ଯାତ୍ରା ପାଇଁ ଆବେଦନ କରିବାକୁ ପୁରୁଷ ଅଭିଭାବକଙ୍କ ଅନୁମତି ଲୋଡାନାହିଁ। ଅର୍ଥାତ ସାଉଦି ଆରବ ଏବେ ପୁରୁଷ ଓ ମହିଳାଙ୍କୁ ସମାନ ଅଧିକାର ପ୍ରଦାନ କରିଛି। ଏହି କ୍ରମରେ ସମସ୍ତ ସାବାଳକ ଓ ସାବାଳିକା ପାସପୋର୍ଟ ପାଇଁ ଆବେଦନ କରିପାରିବେ ଓ ବାହାରକୁ ଯାତ୍ରା କରିପାରିବେ ବୋଲି କୁହାଯାଇଛି। ନୂଆ ନିୟମରେ ଲିଙ୍ଗ, ଭିନ୍ନକ୍ଷମ ଏବଂ ବୟସ ନିର୍ବିଶେଷରେ ମହିଳାଙ୍କୁ ଶିଶୁ ଜନ୍ମ, ବିବାହ ଏବଂ ଛାଡ଼ପତ୍ର ପାଇଁ ଅଧିକାର ପ୍ରଦାନ କରାଯାଇଛି।
ଆଜି ପର୍ଯ୍ୟନ୍ତ ସାଉଦି ଆରବରେ ମହିଳାଙ୍କୁ ପାସପୋର୍ଟ ଏବଂ ବିଦେଶ ଯାତ୍ରା ପାଇଁ ଜଣେ ପୁରୁଷ ଅଭିଭାବକ (ସ୍ୱାମୀ, ବାପା କିମ୍ବା କୌଣସି ପୁରୁଷ ସମ୍ପର୍କୀୟ)ଙ୍କ ଅନୁମତି ନେବାକୁ ପଡୁଥିଲା। ଏବେ ମହିଳାଙ୍କୁ ଏଥିରୁ ମୁକ୍ତି ମିଳିଛି। ସାଉଦି ଆରବ ଏହା ପୂର୍ବରୁ ମହିଳାଙ୍କ ଗାଡ଼ି ଚଳାଇବା ଉପରେ ଲାଗିଥିବା ପ୍ରତିବନ୍ଧକକୁ ଉଠାଇ ଦେଇଥିଲା।
Comments are closed.