ରାଞ୍ଚି : ଝାଡ଼ଖଣ୍ଡରେ ଏକ ଭିଡି ହତ୍ୟା ଘଟଣା ସାମ୍ନାକୁ ଆସିଛି। ରାଜ୍ୟର ଦୁମକା ଜିଲାର ଚିହ୍ନୁଟିଆ ଗ୍ରାମରେ ଗୁରୁବାର ଦିନ ଲୋକମାନେ ଜଣେ ଚୋରକୁ ପିଟି ପିଟି ମାରି ଦେଇଛନ୍ତି।
ଦୁମକା ଏସ୍ପିଙ୍କ କହିବା ଅନୁସାରେ ୪ ଜଣ ଲୋକ ଚିହ୍ନୁଟିଆ ଗ୍ରାମରେ ଚୋରି କରୁଥିବା ସମୟରେ ଧରାପଡିଯାଇଥିଲେ। ତେବେ ୩ ଜଣ ଠେଲାପେଲା କରି ଖସି ପଳାଇବାରେ ସଫଳ ହୋଇଥିଲାବେଳେ ଜଣକୁ ଲୋକେ ପିଟି ପିଟି ହତ୍ୟା କରିଛନ୍ତି। ମୃତକ ଜଣେ ମୋଷ୍ଟ ୱାଣ୍ଟେଡ ଅପରାଧୀ ଥିଲା। ଏନେଇ ଏକ ମାମଲା ରୁଜୁ କରାଯାଇଛି ଓ ଗ୍ରାମର ୪ ଜଣଙ୍କୁ ଗିରଫ କରି ପଚରାଉଚୁରା କରାଯାଉଛି ବୋଲି ପୁଲିସ୍ ସୂଚନା ଦେଇଛି।
ଗୁରୁବାର ଭୋର ସମୟରେ ୪ ଜଣ ଯାକଁ ଚୋର ଚିହ୍ନୁଟିଆ ଗ୍ରାମର ଆନନ୍ଦ ଲାଲ ମାରାଣ୍ଡିଙ୍କ ଘରେ ସିନ୍ଧି କରି ଗୋଟିଏ ବାକ୍ସ ଓ ଅନ୍ୟ କେତେକ ସାମଗ୍ରୀ ଚୋରି କରିଥିଲେ। ଗ୍ରାମରୁ ବାହରୁଥିବା ବେଳେ ସେମାନେ ଲୋକଙ୍କ ହାତରେ ଧରାପଡିଥିଲେ। ତେବେ ମୃତ ଚୋରର ନାମ ଭୋଲା ହାଜରା ଓ ତାର ଘର ତାଳଝରୀ ଥାନା ଅଧୀନ ଲୋହାରିଆ ଗ୍ରାମରେ ବୋଲି ଜଣାପଡିଛି। ଭୋଲା ପୂର୍ବରୁ ଅପରାଧ ମାମଲାରେ ଜେଲ ଯାଇଥିଲା। ତା ବିରୋଧରେ ଦୁମକା, ଦେବଘର, ସାରୱା ଥାନାରେ ଅନେକ ମାମଲା ରହିଛି।
