ଆଜମ ଖାନଙ୍କ ପୁଅ ବିଧାୟକ ଅବଦୁଲା ଗିରଫ

ରାମପୁର : ଉତ୍ତରପ୍ରଦେଶର ପୂର୍ବତନ ମନ୍ତ୍ରୀ ତଥା ସମାଜବାଦୀ ପାର୍ଟି (ଏସପି) ସାଂସଦ ଆଜମ ଖାନଙ୍କ ପୁଅ ତଥା ବିଧାୟକ ଅବଦୁଲାଙ୍କୁ ରାମପୁର ପୁଲିସ ବୁଧବାର ଗିରଫ କରିଛି। ଜୌହାର ବିଶ୍ୱବିଦ୍ୟାଳୟରେ ଚଢଉ ବେଳେ ସେ ସରକାରୀ କାର୍ଯ୍ୟରେ ବାଧା ସୃଷ୍ଟି କରିଥିଲେ ବୋଲି ଅଭିଯୋଗ ହୋଇଛି।
କାର୍ଯ୍ୟାନୁଷ୍ଠାନ ସମୟରେ ବିଧାୟକଙ୍କ ସମର୍ଥକ ଓ ପୁଲିସ୍‍ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା। ଏହାସହ ଜାଲ କାଗଜପତ୍ରରେ ପାସପୋର୍ଟ ପ୍ରସ୍ତୁତ କରିଥିବା ନେଇ ମଙ୍ଗଳବାର ଅବଦୁଲାଙ୍କ ବିରୋଧରେ ମାମଲା ରୁଜୁ ହୋଇଛି। ଅବଦୁଲା ସ୍ୱାର ଟାଣ୍ଡା ବିଧାନସଭା ଆସନରୁ ବିଧାୟକ ଅଛନ୍ତି। ମଦ୍ରାସା ଆଲିୟାରୁ ଚୋରି ହୋଇଥିବା ପୁସ୍ତକ ମାମଲରେ ଜୌହାର ବିଶ୍ୱବିଦ୍ୟାଳୟରେ ଦ୍ୱିତୀୟ ଦିନ ଚଢଉ ହୋଇଛି। ବିଶ୍ୱବିଦ୍ୟାଳୟରୁ ଏପର୍ଯ୍ୟନ୍ତ ୨୫୦୦ ପୁସ୍ତକ ଜବତ ହୋଇଛି। ୪ ଜଣ କର୍ମଚାରୀଙ୍କୁ ଗିରଫ କରାଯାଇଛି। ଚଢଉ ବେଳେ ବୁଧବାର ଅପରାହ୍ଣରେ ବିଶ୍ୱବିଦ୍ୟାଳୟର ସିଇଓ ଅବଦୁଲା ସେଠାରେ ପହଞ୍ଚିଥିଲେ। ଏହି ସମୟରେ ପୁଲିସ୍‍ ସହ ତାଙ୍କର ବଚସା ହୋଇଥିଲା। ଫଳରେ ପୁଲିସ ତାଙ୍କୁ ଗିରଫ କରି ଜେରା ପାଇଁ ନେଇଯାଇଛି।