ପୁରୀ : ୧୦୮ଗଡୁ ଜଳରେ ସ୍ନାନପରେ ଅସୁସ୍ଥ ହୋଇଛନ୍ତି ମହାପ୍ରଭୁ। ଶ୍ରୀମନ୍ଦିର ଅଣସର ଘରେ ବିଶ୍ରାମ ନେଇଛନ୍ତି। ଏଥିପାଇଁ ମଙ୍ଗଳବାରଠାରୁ ଆରମ୍ଭ ହୋଇଛି ପଟ୍ଟିଦିଅଁ ପୂଜା। ଶ୍ରୀଜଗନ୍ନାଥଙ୍କ ପାଇଁ ନାରାୟଣ, ଶ୍ରୀବଳଭଦ୍ରଙ୍କ ପାଇଁ ଅନନ୍ତ ବାସୁଦେବ ଏବଂ ଦେବୀ ସୁଭଦ୍ରାଙ୍କ ପାଇଁ ଭୁବନେଶ୍ବରୀଙ୍କ ପୂଜା ଆରମ୍ଭ ହୋଇଛି । ପଟ୍ଟିଦିଅଁଙ୍କ ପାଖରେ ମଙ୍ଗଳଆଳତି, ଅବକାଶ, ଗୋପାଳବଲ୍ଲଭ, ସକାଳଧୂପ, ଭୋଗମଣ୍ଡପ, ସନ୍ଧ୍ୟାଆଳତି, ସନ୍ଧ୍ୟାଧୂପ, ବଡ଼ସିଂହାରବେଶ ଏବଂ ବଡ଼ସିଂହାର ଭୋଗ ଆଦି ଅନୁଷ୍ଠିତ ହେଉଛି । ଦେବସ୍ନାନ ପୂର୍ଣ୍ଣିମା ତିଥିରେ ସ୍ନାନମଣ୍ଡପରେ ୧୦୮ଗଡୁ ଜଳରେ ସ୍ନାନପରେ ମହାପ୍ରଭୁ ଅସୁସ୍ଥ ହୋଇଛନ୍ତି।
ପରମ୍ପରା ଅନୁଯାୟୀ ପଟ୍ଟିଦିଅଁ ପୂଜା ଆରମ୍ଭ ହୋଇଛି। ଦଇତାପତି ସେବକମାନେ ଅଣସରଘରେ ପ୍ରଭୁ ଶ୍ରୀବଳଭଦ୍ର, ଶ୍ରୀଜଗନ୍ନାଥ, ଦେବୀ ସୁଭଦ୍ରା ଏବଂ ଚକ୍ରରାଜ ଶ୍ରୀସୁଦର୍ଶନଙ୍କୁ ଗୁପ୍ତସେବା କରିବେ। ସେଠାରେ ପଣା ଓ ଚକଟା ଭୋଗ କରାଯିବ। ଅସୁସ୍ଥତା ଯୋଗୁଁ ପ୍ରଭୁ ଶୁକ୍ଳଫୁଲ ଏବଂ ସୂତାବସ୍ତ୍ର ପରିଧାନ କରିବେ। ଫୁଲୁରିତେଲ, ଦଶମୂଳ ମହୋଷଧି ଏବଂ ଖଳିଲାଗି କରାଯିବ। ଏହାପରେ ଶ୍ରୀଜୀଉ ସମ୍ପୂର୍ଣ୍ଣ ସୁସ୍ଥହୋଇ ଚକାବିଜେ କରିବେ। ଆଗାମୀ ୩୦ତାରିଖ ଦିନ ରାଜପ୍ରାସାଦ ବିଜେନୀତି ଅନୁଷ୍ଠିତ ହେବ।
ସେବକମାନେ ପ୍ରଭୁଙ୍କ ସୁସ୍ଥହେବା ଖବର ଗଜପତି ମହାରାଜାଙ୍କୁ ଜଣାଇବେ। ଜୁଲାଇ ୨ତାରିଖ ଅମାବାସ୍ୟା ତିଥିରେ ଦାରୁବ୍ରହ୍ମଙ୍କ ନବଯୌବନ ଦର୍ଶନ ଅନୁଷ୍ଠିତ ହେବ। ସେଦିନ ସକାଳୁ ପଟ୍ଟିଦିଅଁଙ୍କୁ ସ୍ଥାନାନ୍ତର କରାଯିବ। ୪ତାରିଖରେ ଭାଇଭଉଣୀଙ୍କ ସହ କାଳିଆ ଠାକୁର ଶ୍ରୀଜଗନ୍ନାଥ ନବଦିନବ୍ୟାପୀ ରଥଯାତ୍ରା କରିବେ। ଦାରୁବ୍ରହ୍ମଙ୍କ ଅଣସର ପୂଜା ସମୟରେ ଅଲାରନାଥ ଦର୍ଶନ ପାଇଁ ଭକ୍ତଙ୍କ ଗହଳି ପରିଲକ୍ଷିତ ହୋଇଛି। ଏହି ସମୟରେ ଅଲାରନାଥଙ୍କୁ ଦର୍ଶନର ପୁଣ୍ୟ ଶ୍ରୀଜଗନ୍ନାଥ ଦର୍ଶନ ସହ ସମାନ ବୋଲି କୁହାଯାଏ।
Comments are closed.