ବଡ଼ସାହି : ସାନକେରକୋ ପଞ୍ଚାୟତର ଜଡ଼ିପାଳ ଗ୍ରାମର ସୁରସାହିରେ ରବିବାର ଆକସ୍ମିକ ଅଗ୍ନିକାଣ୍ଡ ଘଟି ରନ୍ଧନ ଗ୍ୟାସ ସିଲିଣ୍ଡର ବିସ୍ଫୋରଣରେ ୩ଟି ପରିବାରର ୬ବଖରା ଘର ଭସ୍ମୀଭୂତ ହୋଇଛି। ଏଥିସହିତ ତିନିଚକିଆ ଅଟୋ ରିକ୍ସା, କମ୍ପ୍ୟୁଟର, ପ୍ରିଂଟର, ପାଣିପମ୍ପ, ଧାନ ଚାଉଳ, ଆସବାବପତ୍ର, ନଗଦ ଟଙ୍କା ୩ଟି ନଡାଗଦା ସମେତ ଲକ୍ଷାଧିକ ଟଙ୍କା ସମ୍ପତ୍ତି ଜଳିଯାଇଛି। ଅପରାହ୍ନ ୪ଟାରେ ଗ୍ରାମର ଅନାମ ବେହେରାଙ୍କ ଘରେ ଗ୍ୟାସରେ ରୋଷେଇ କରୁଥିବା ସମୟରେ ନିଆଁ ଲାଗିଥିଲା। ଲିଭାଇବା ସମୟରେ ଘରେ ଥିବା ରନ୍ଧନ ଗ୍ୟାସ ସିଲିଣ୍ଡର ଫାଟିବା ପରେ ନିଆଁ ଦ୍ରୁତ ଗତିରେ ଲବଙ୍ଗ ବେହେରା ଓ ଧରଣୀଧର ବେହେରାଙ୍କ ଘରେ ଲାଗିଥିଲା। ଏଥିରେ ଧନୁ ବୋହରା, ଅନାମ ବେହେରା, ଚିନ୍ମୟୀ ବେହେରା ଓ ନିଆଁ ଲିଭାଇବାକୁ ଆସିଥିବା ରମେଶ ସିଂ ନିଆଁରେ ପୋଡ଼ି ଆହାତ ହୋଇଛନ୍ତି। ସଙ୍ଗେ ସଙ୍ଗେ ସେମାନଙ୍କୁ ଡୁକୁରା ଡ଼ାକ୍ତରଖାନାକୁ ନିଆଯାଇଥିବା ବେଳେ ଜଣଙ୍କୁ ବାରିପଦା ସ୍ଥାନାନ୍ତର କରାଯାଇଛି। ବଡ଼ସାହି, ବାରିପଦା ଓ ଖୁଣ୍ଟା ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛନ୍ତି। ସାନକେରକୋ ରାଜସ୍ୱ ନିରୀକ୍ଷକ ଘଟଣାସ୍ଥଳ ପରିଦର୍ଶନ କରି କ୍ଷୟକ୍ଷତିର ଆକଳନ କରିବା ସହ କ୍ଷତିଗ୍ରସ୍ତ ପରିବାରକୁ ପଲିଥିନ ପ୍ରଦାନ କରିଛନ୍ତି। ବିପନ୍ନ ପରିବାରକୁ ସରକାରୀ ସହାୟତା ସହ ବିଜୁ ପକ୍କାଘର ପ୍ରଦାନ କରିବା ପାଇଁ ଦାବି ହୋଇଛି।
