ସମାଜ ଡିଜିଟାଲ ଡେସ୍କ: ଆସନ୍ତା ୨୩ ତାରିଖରେ ମୂଳ ରତ୍ନଭଣ୍ଡାରକୁ ସ୍ଥାନାନ୍ତର କରାଯିବ ମହାପ୍ରଭୁଙ୍କ ଅଳଙ୍କାର। ସେହିଦିନ ସମସ୍ତ ଅଳଙ୍କାର ସ୍ଥାନାନ୍ତର କରାଯିବାକୁ ଲକ୍ଷ୍ୟ ରଖାଯାଇଛି। ଯଦି ଏହା ଗୋଟିଏ ଦିନରେ ସମ୍ପନ୍ନ ନ ହୁଏ, ତେବେ ୨୪ ତାରିଖରେ ପୁନର୍ବାର ସ୍ଥାନାନ୍ତର କରାଯିବ ବୋଲି ରତ୍ନଭଣ୍ଡାର ସବକମିଟି ବୈଠକରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ ସୂଚନା ଦେଇଛନ୍ତି।
ଅଳଙ୍କାର ସ୍ଥାନାନ୍ତର ଲାଗି ଭୋର ୪ଟାରୁ ଦ୍ଵାରଫିଟା ହେବ। ଏହା ପରେ ଅମୃତ ବେଳା ଅନୁସାରେ ରତ୍ନ ସ୍ଥାନାନ୍ତର କରାଯିବ। ଏଥିପାଇଁ ଉକ୍ତ ଦିନ ସାଧାରଣ ଶ୍ରଦ୍ଧାଳୁଙ୍କ ଦର୍ଶନ ଉପରେ କଟକଣା ରହିବ। ସମସ୍ତ ଅଳଙ୍କାର ସ୍ଥାନାନ୍ତର କରାଯିବା ପରେ ମାଜିଷ୍ଟ୍ରେଟଙ୍କ ଉପସ୍ଥିତିରେ ରତ୍ନଭଣ୍ଡାର ତାଲା ପକାଯିବ। ଏହା ପରେ ସେହି ଚାବିକୁ ଟ୍ରେଜେରିରେ ଦାଖଲ କରାଯିବ। ରତ୍ନଭଣ୍ଡାର ଅଳଙ୍କାର ଗଣତି ମଣତି ଉପରେ ପରିଚାଳନା କମିଟି ନିଷ୍ପତ୍ତି ନେବ ବୋଲି ପାଢ଼ୀ କହିଛନ୍ତି। ଗଣତି ମଣତି ସମୟରେ ୧୯୭୮ ମସିହା ରତ୍ନ ଅଳଙ୍କାର ତାଲିକା ସହିତ ମେଳକ କରାଯିବ।
