ସମାଜ ଡିଜିଟାଲ ଡେସ୍କ: ପୁଷ୍ପା-୨ ଦଳାଚକଟା ମାମଲାରେ ଅଲ୍ଲୁ ଅର୍ଜୁନଙ୍କୁ ଦାୟୀ କରିଥିଲେ ତେଲଙ୍ଗାନା ମୁଖ୍ୟମନ୍ତ୍ରୀ ଏ ରେବନ୍ତ ରେଡ୍ଡୀ। ଅନୁମତି ନ ଥିବା ସତ୍ବେ ଅଲ୍ଲୁ ସନ୍ଧ୍ୟା ସିନେମା ହଲକୁ ଯାଇଥିବାରୁ ଏଭଳି ଘଟଣା ଘଟିଲା ବୋଲି ମୁଖ୍ୟମନ୍ତ୍ରୀ ବିଧାନସଭାରେ କହିଥିଲେ। ତେବେ ଏହାକୁ ଖଣ୍ଡନ କରିଛନ୍ତି ଅଭିନେତା ଅଲ୍ଲୁ ଅର୍ଜୁନ। ଏଭଳି ଅଭିଯୋଗ ଭିତ୍ତିହୀନ ଏବଂ ଏହା ଦ୍ଵାରା କେବଳ ତାଙ୍କ ବିରୋଧରେ ଅପପ୍ରଚାର କରାଯିବା ସହିତ ତାଙ୍କ ଚରିତ୍ର ସଂହାର କରାଯାଉଛି ବୋଲି ଅଲ୍ଲୁ କହିଛନ୍ତି।
ଉଭୟ ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀ ଏବଂ ଏଆଇଏମଆଇଏମ ବିଧାୟକ ଅକବରୁଦ୍ଦିନ ଓଓ୍ବେସୀ ବିଧାନସଭାରେ ଅଲ୍ଲୁଙ୍କ ବିରୋଧରେ ସମାନ ଅଭିଯୋଗ କରିଥିଲେ। ଏହାର ପ୍ରତିକ୍ରିୟାରେ ଅଲ୍ଲୁ ଶନିବାର ରାତିରେ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ସେ ଚଳଚ୍ଚିତ୍ର ଦ୍ଵାରା ତେଲୁଗୁ ଲୋକମାନଙ୍କର ସମ୍ନାନ ଏକ ନୂଆ ଉଚ୍ଚତାକୁ ନେବାକୁ ଚେଷ୍ଟା କରିଛନ୍ତି। କିନ୍ତୁ ଆମେ ପରସ୍ପରର ଗୋଡ଼ ଟାଣିବାରେ ବ୍ୟସ୍ତ। ଦଳାଚକଟା ଘଟଣା ସମ୍ପୂର୍ଣ୍ଣ ଭାବେ ଏକ ଦୁର୍ଘଟଣା ଥିଲା। ଏଥିପାଇଁ କେହି ଦାୟୀ ନୁହନ୍ତି। ମାତ୍ର ତାଙ୍କ ବିରୋଧରେ ଅପପ୍ରଚାର କରାଯାଇ ତାଙ୍କୁ ମାନସମ୍ମାନକୁ ନଷ୍ଟ କରିବାକୁ ଉଦ୍ୟମ କରାଯାଉଛି।
ଅଲ୍ଲୁ କହିଛନ୍ତି, ସେ ସିନେମା ହଲ ଭିତରେ ଚଳଚ୍ଚିତ୍ର ଦେଖୁଥିଲେ। କୌଣସି ପୁଲିସ ଅଧିକାରୀ ତାଙ୍କୁ ସିନେମା ହଲରୁ ଚାଲିଯିବାକୁ କହି ନ ଥିଲେ। ବରଂ ତାଙ୍କ ବ୍ୟକ୍ତିଗତ ପରିଚାଳନା ସଦସ୍ୟମାନେ ଅସମ୍ଭାଳ ଭିଡ଼ କଥା କହିବା ସହିତ ସିନେମା ହଲରୁ ବାହାରି ଚାଲିଯିବାକୁ ପରାମର୍ଶ ଦେଇଥିଲେ। ଏହା ପରେ ସେ ସେଠାରୁ ବାହାରି ଆସିଥିଲେ। କିନ୍ତୁ ତାଙ୍କ ପିଲାମାନେ ସେହିଠାରେ ରହି ଚଳଚ୍ଚିତ୍ର ଦେଖିଥିଲେ। ପରଦିନ ସକାଳେ ସେ ଜାଣିବାକୁ ପାଇଲେ ଯେ ଜଣେ ହଲ ବାହାରେ ଦଳାଚକଟା ଘଟି ଜଣେ ମହିଳାଙ୍କ ମୃତ୍ୟୁ ଘଟିଛି।
