ଗୋପ : ‘ସମାଜ’ର ପୂର୍ବତନ ମୁଖ୍ୟ ପରିଚାଳକ ହେମନ୍ତ କୁମାର ସାହୁଙ୍କ ଏକାଦଶାହ ଉପଲକ୍ଷେ ଏକ ସ୍ମୃତିଚାରଣ ସଭା କବି ସତ୍ୟଶିବ ଦାସଙ୍କ ଅଧ୍ୟକ୍ଷତାରେ ଗୋପ ବ୍ଲକ୍ ଅଧୀନ ଖଡ଼ିସସ୍ଥିତ ବାସଭବନରେ ମଙ୍ଗଳବାର ଅନୁଷ୍ଠିତ ହୋଇଯାଇଛି । ଏଥିରେ ଯୋଗଦେଇ ବକ୍ତାମାନେ ସ୍ୱର୍ଗତ ସାହୁଙ୍କ ଗୁଣଗାନ କରାଯିବା ସହ ତାଙ୍କର ଅମର ଆତ୍ମାର ସଦ୍ଗତି କାମନା କରି ନିରବ ପ୍ରାର୍ଥନା କରିଥିଲେ। ଏହି ଅବସରରେ ବହୁ ମାନ୍ୟଗଣ୍ୟ ବ୍ୟକ୍ତି ତାଙ୍କ ଫଟୋଚିତ୍ରରେ ମାଲ୍ୟାର୍ପଣ ସହ ତାଙ୍କ ଜୀବନୀ ସମ୍ପର୍କରେ ଆଲୋକପାତ କରିଥିଲେ। ସ୍ୱର୍ଗତ ସାହୁ ବାୟୁସେନାରେ କାର୍ଯ୍ୟ କରି ବେଶ୍ ପ୍ରଶଂସାର ପାତ୍ର ହୋଇଥିବାବେଳେ ‘ସମାଜ’ ପ୍ରତି ତାଙ୍କର ଅବଦାନ ଅତୁଳନୀୟ ଥିଲା ବୋଲି ଲୋକସେବକ ମଣ୍ଡଳର ରାଷ୍ଟ୍ରୀୟ ସମ୍ପାଦକ ନିରଞ୍ଜନ ରଥ କହିଥିଲେ।
ଅନ୍ୟମାନଙ୍କ ମଧ୍ୟରେ ବିଧାୟକ ତଥା ପୁରୀ ଜିଲା ଯୋଜନା ବୋର୍ଡ଼ ଅଧ୍ୟକ୍ଷ ସମୀର ରଞ୍ଜନ ଦାଶ, ବିଧାୟକ ସୁରେନ୍ଦ୍ର ସେଠୀ, ‘ସମାଜ’ର କାର୍ଯ୍ୟକାରୀ ମୁଖ୍ୟ ପରିଚାଳକ ପ୍ରିୟବ୍ରତ ମହାନ୍ତି, ‘ସମାଜ’ର ବିତ୍ତ ପରିଚାଳକ ପ୍ରଭାତ କୁମାର ଦାଶ, ରିକଭରୀ ମ୍ୟାନେଜର ଦେବବ୍ରତ ଦାସ, ସିଷ୍ଟମ ମ୍ୟାନେଜର ପ୍ରଦୀପ କୁମାର ବେହେରା, ପୁରୀ ଜିଲା ପରିଷଦ ଅଧ୍ୟକ୍ଷ ଜ୍ୟୋତିର୍ମୟ ଦଳାଇ, ‘ସମାଜ’ ବାଲେଶ୍ୱର ସଂସ୍କରଣ ଶାଖା ପରିଚାଳକ ମଧୁସୂଦନ ଦାସ, ବରିଷ୍ଠ ସାମ୍ବାଦିକ ବିପ୍ଳବ ମହାନ୍ତି, ଡା. ଚୌଧୁରୀ ସତ୍ୟବ୍ରତ ନନ୍ଦ, କଟକ ଉଚ୍ଚ ନ୍ୟାୟାଳୟର ବରିଷ୍ଠ ଆଇନଜୀବୀ ଧରଣୀଧର ନାୟକ, ତାଙ୍କ ବଡ଼ ଭାଇ ବସନ୍ତ କୁମାର ସାହୁ, ସାନ ଭାଇ ଶରତ କୁମାର ସାହୁ, ଅଧ୍ୟାପକ ଶୈଳେନ୍ଦ୍ର କୁମାର ରଥ, ପ୍ରକାଶ ଚନ୍ଦ୍ର ଖଟୋଇ, ନଗେନ୍ଦ୍ର କୁମାର ପାଢ଼ୀ, ଅଚ୍ୟୁତାନନ୍ଦ ପ୍ରଧାନ ପ୍ରମୁଖ ସ୍ୱର୍ଗତ ସାହୁଙ୍କ ଫଟୋଚିତ୍ରରେ ମାଲ୍ୟାର୍ପଣ ସହିତ ସ୍ମୃତିଚାରଣ କରିଥିଲେ। ଏହି ଅବସରରେ ସ୍ୱର୍ଗତ ସାହୁଙ୍କ ଜୀବନୀ ସମ୍ପର୍କରେ ‘ସ୍ମୃତି ଅର୍ଘ’ ସ୍ମରଣିକା ଉନ୍ମୋଚିତ ହୋଇଥିଲା।
