କାଙ୍କେର: ଛତିଶଗଡ଼ କାଙ୍କେର ଜିଲାର ହିଦୁର ଅଞ୍ଚଳରେ ରବିବାର ସୁରକ୍ଷାକର୍ମୀ ଏବଂ ନକ୍ସଲଙ୍କ ମଧ୍ୟରେ ଗୁଳି ବିନିମୟ ହୋଇଛି। ହିଦୁରସ୍ଥିତ ଜଙ୍ଗଲରେ ହୋଇଥିବା ଗୁଳି ବିନିମୟରେ ଜଣେ ଯବାନ ଶହୀଦ ହୋଇଛନ୍ତି। ଯବାନ ଜଣକ ବସ୍ତର ଫାଇଟର୍ସ କନଷ୍ଟେବଳ ରମେଶ କୁରେଠୀ ବୋଲି ଜଣାପଡ଼ିଛି। ଏଥିରେ ଜଣେ ନକ୍ସଲ ମଧ୍ୟ ନିହତ ହୋଇଥିବା ସୂଚନା ମିଳିଛି। ଘଟଣାସ୍ଥଳରୁ ଜଣେ ନକ୍ସଲର ମୃତଦେହ ସହ ଏକେ୪୭ ମଧ୍ୟ ଜବତ ହୋଇଛି।
ସୂଚନା ଅନୁସାରେ, ଯବାନମାନେ ହିଦୁରର ଜଙ୍ଗଲରେ ତଲାସୀ ଅଭିଯାନ ଚଳାଇଥିଲେ। ଏହି ସମୟରେ ନକ୍ସଲମାନେ ଗୁଳି ଚଳାଇଥିଲେ। ଜଙ୍ଗଲରେ ପ୍ରାୟ ୧ ଘଣ୍ଟା ଧରି ଗୁଳି ବିନିମୟ ଚାଲିଥିଲା। ଛୋଟେ ବେଠିୟା ଥାନା ଅଞ୍ଚଳରେ ଏହି ଘଟଣା ଘଟିଛି। ବର୍ତ୍ତମାନ ବିଏସଏଫ ଏବଂ ଡିଆରଜି ଯବାନମାନେ ଆଖପାଖ ଜଙ୍ଗଲ ଅଞ୍ଚଳରେ ତଲାସୀ ଜାରି ରଖିଛନ୍ତି। କାଙ୍କେର ଏସପି ଆଇ.କେ ଏଲେସେଲା ଏନେଇ ସୂଚନା ଦେଇଛନ୍ତି।
