ଜୟପୁର: ବସରେ ନିଆଁ ଲାଗି ୧୦ ପର୍ଯ୍ୟଟକ ଜୀବନ୍ତ ଦଗ୍ଧ ହୋଇଯାଇଛନ୍ତି। ଏଭଳି ଦୁଃଖଦ ଘଟଣା ଘଟିଛି ହରିୟାଣାର ନୁହ ନିକଟ କୁଣ୍ଡଲି-ମାନେଶ୍ୱର-ପାୱାଲ ଏକ୍ସପ୍ରେସୱେରେ। ଏହି ଘଟଣାରେ ୨୪ରୁ ଅଧିକ ଲୋକ ଆହତ ହୋଇଛନ୍ତି। ସେମାନଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି।
ଆହତଙ୍କଠାରୁ ମିଳିଥିବା ସୂଚନା ଅନୁସାରେ, ସେମାନେ ଏକ ବସ ଭଡ଼ା କରି ବାରଣାସୀ ଏବଂ ମଥୁରା ବୃନ୍ଦାବନ ବୁଲିବାକୁ ବାହାରିଥିଲେ। ବସରେ ୬୦ ଜଣ ଥିଲେ, ଯେଉଁମାନଙ୍କ ମଧ୍ୟରେ ମହିଳା ଏବଂ ଶିଶୁ ମଧ୍ୟ ରହିଥିଲେ। ସମସ୍ତେ ସମ୍ପର୍କୀୟ। ପଞ୍ଚାବର ଲୁଧିଆନା, ହୋସିଆରପୁର ଏବଂ ଚଣ୍ଡୀଗଡ଼଼ ଅଞ୍ଚଳରେ ସମସ୍ତଙ୍କ ଘର। ଶୁକ୍ରବାର ଦର୍ଶନ ସାରି ବିଳମ୍ବିତ ରାତିରେ ଫେରୁଥିଲେ। ରାତି ପ୍ରାୟ ସାଢ଼େ ୧ଟାରେ ଚଳନ୍ତା ବସରେ ହଠାତ୍ ନିଆଁ ଲାଗିଯାଇଥିଲା। ଡ୍ରାଇଭର ଜାଣିବା ପରେ ଗାଡ଼ିକୁ ଅଟକାଇଥିଲେ। ସ୍ଥାନୀୟ ଲୋକଙ୍କ ସହାୟତାରେ ଯାତ୍ରୀମାନଙ୍କୁ ବାହାରକୁ ବାହାର କରାଯାଇଥିଲା।
ତେବେ ଉଦ୍ଧାର ସମୟରେ ୮ ଜଣ ଜୀବନ୍ତ ଜଳିଯାଇଥିଲେ। ୨୪ରୁ ଅଧିକ ଲୋକ ନିଆଁରେ ପୋଡ଼ି ହୋଇ ଆହତ ହୋଇଥିଲେ। ଖବର ପାଇଁ ଦମକଳ ବାହିନୀ ଏବଂ ଆମ୍ବୁଲାନ୍ସ ଘଟଣାସ୍ଥଳରେ ପହଞ୍ଚିଥିଲା। ଆହତଙ୍କୁ ଉଦ୍ଧାର କରି ବିଭିନ୍ନ ହସ୍ପିଟାଲକୁ ନିଆଯାଇଥିଲା। ହସ୍ପିଟାଲରେ ଅନ୍ୟ ୨ ଜଣଙ୍କ ମୃତ୍ୟୁ ଘଟିଥିବା ସୂଚନା ମିଳିଛି। କେଉଁ ପରିସ୍ଥିତିରେ ବସରେ ନିଆଁ ଲାଗିଛି ପୁଲିସ ତାହାର ତଦନ୍ତ ଚଳାଇଛି।
Comments are closed.