ଓଲଟିଲା ଆମ୍ବୁଲାନ୍ସ : ଦୁର୍ଘଟଣାସ୍ଥଳରେ ପ୍ରସବ,ଶିଶୁକନ୍ୟା ମୃତ

ପାଟଣା : ପାଟଣା ଡାକ୍ତରଖାନାରେ ଚାକୁଣ୍ଡାପାଳ ଗ୍ରାମର ବଦୁନି ମୁଣ୍ଡା(୨୫) ସନ୍ତାନ ପ୍ରସବ ପାଇଁ ଭର୍ତ୍ତି ହୋଇଥିବାବେଳେ ତାଙ୍କୁ ଜଟିଳ ପରିସ୍ଥିତି ପାଇଁ ୧୦୨ ଆମ୍ବୁଲାନ୍ସ ଯୋଗେ କରଞ୍ଜିଆ ଡାକ୍ତରଖାନାକୁ ପଠାଯାଇଥିଲା। ହେଲେ କୌଣସି କାରଣରୁ ୧୦୨ ଆମ୍ବୁଲାନ୍ସ ଦୁର୍ଘଟଣାଗସ୍ତ ହୋଇ ସେଠାରେ ଓଲଟି ପଡ଼ିଥିଲା। ପରେ ଗର୍ଭବତୀ ମହିଳା ଜଣକ ଗାଡ଼ିରୁ ପଡ଼ିଯିବା ସହ ଏକ କନ୍ୟା ସନ୍ତାନ ପ୍ରସବ କରିଥିଲେ। ଏହି ଘଟଣା ଏଠାରେ ଚର୍ଚ୍ଚାର ବିଷୟ ହୋଇଛି।
କରଞ୍ଜିଆ ଅଭିମୁଖେ ଯାଉଥିବା ଏହି ଆମ୍ବୁଲାନ୍ସ କୌଣସି କାରଣରୁ ପାଟଣା-ସାହାରପଡା ମଧ୍ୟସ୍ଥ ତିଳବେଡା ନିକଟରେ ଦୁର୍ଘଟଣାଗ୍ରସ୍ତ ହୋଇ ଓଲଟିପଡ଼ିଥିଲା। ଦ୍ରୁତଗତିରେ ଯାଉଥିବା କାରଣରୁ ଏଭଳି ଘଟଣା ଘଟିଥିବା ଜଣାପଡ଼ିଛି। ମଙ୍ଗଳବାର ସନ୍ଧ୍ୟା ସାଢେ ୬ଟା ସମୟରେ ଏହି ଘଟଣା ଘଟିଥିବା ସମୟରେ ଗର୍ଭବତୀଙ୍କ କୌଣସି କ୍ଷତି ହୋଇ ନଥିବା ଜଣାପଡ଼ିଛି। ପରେ ସେ ଏକ କନ୍ୟା ସନ୍ତାନ ପ୍ରସବ କରିଥିଲେ। ଖବର ପାଇ ସାହାରପଡା ଓ ପାଟଣାରୁ ଦମକଳ ବାହିନୀ ଓ ପାଟଣା ଥାନା ଅଧିକାରିଣୀ ଘଟଣାସ୍ଥଳରେ ପହଞ୍ଚି ୧୦୮ଆମ୍ବୁଲାନ୍ସ ମାଧ୍ୟମରେ ମେଡିକାଲ ପଠାଇଥିଲେ। ତେବେ ମା’ ସୁସ୍ଥ ଥିବା ବେଳେ ଡାକ୍ତରଖାନାରେ ଶିଶୁକନ୍ୟାର ମୃତ୍ୟୁ ଘଟିଥିବା ଜଣାପଡ଼ିଛି।