ଆଠଗଡ : ଆଠଗଡ ସହର ମଧ୍ୟଦେଇ ଯାଇଥିବା ୬୫ନମ୍ବର ରାଜ୍ୟ ରାଜପଥ ସମେତ ଆଠଗଡ-ମୁଣ୍ଡଳି ଏବଂ ଧବଳେଶ୍ୱର ରାସ୍ତାରେ ବିଭିନ୍ନ ସ୍ଥାନରେ ରାସ୍ତା ଉପରେ ପ୍ରଚାର ତୋରଣ ମାସ ମାସ ଧରି ରହୁଥିବାରୁ ଏହା ଦୁର୍ଘଟଣାର କାରଣ ହେଉଛି। ଏଥି ସହିତ ଯାନବାହାନ ନିର୍ବିଘ୍ନରେ ଯାତାୟତ କରିବାରେ ଏବଂ ଟ୍ରାଫିକ୍ ସମସ୍ୟା ସୃଷ୍ଟି ହେଉଥିଲେ ମଧ୍ୟ ପ୍ରଶାସନ ଏ ସବୁ ଦେଖି ନଦେଖିବା ଭଳି ରହୁଥିବାରୁ ଜନ ଅସନ୍ତୋଷ ସୃଷ୍ଟି ହେଉଛି । ଯେଉଁ କାର୍ଯ୍ୟକ୍ରମ ପାଇଁ ହେଉ ଅବା ନବବର୍ଷ ଓ ବିଭିନ୍ନ ଜାନିଯାତ୍ରା ପାଇଁ ବିଭିନ୍ନ ରାଜନୈତିକ ଦଳ ପକ୍ଷରୁ ରାସ୍ତା ପାର ତୋରଣ ମାନ ଲଗାଯାଉଛି । ଏହି ତୋରଣ ଲଗାରେ ଶାସକ ଦଳ ସର୍ବାଗ୍ରେ ରହିଥିବା ଦେଖାଯାଉଛି । ହେଲେ କାର୍ଯ୍ୟକ୍ରମ ବା ବିଶେଷ ଦିନ ଗୁଡିକ ଅତିକ୍ରାନ୍ତ ହେବା ପରେ ମାସ ମାସ ଧରି ତୋରଣ ଗୁଡିକ ରାସ୍ତା ଉପରେ ରହୁଥିବାରୁ ସମସ୍ୟା ଉପୁଜୁଛି । ନିୟମ ଅନୁଯାୟୀ କୌଣସି ଜାତୀୟ ରାଜପଥ ବା ରାଜ୍ୟ ରାଜପଥରେ ରାସ୍ତାପାର ତୋରଣ ଲଗାଯିବା କଥା ନୁହେଁ । କିନ୍ତୁ ନିୟମକୁ ଖୋଲାଖୋଲି ଉଲ୍ଲଙ୍ଘନ କରାଯାଉଥିଲେ ମଧ୍ୟ ଏଠାରେ ପ୍ରଶାସନ ଓ ପୁଲିସ ନିରବଦ୍ରଷ୍ଟା ସାଜିଛନ୍ତି । ଏବେ କାଳବୈଶାଖୀ ଓ ପଶ୍ଚିମାଝଡ ଯୋଗୁଁ ଝଡ ବତାଶ ହେଉଥିବାରୁ ରାସ୍ତା ଉପରେ ଥିବା ତୋରଣ ଗୁଡିକ ପଥଚାରୀଙ୍କ ପାଇଁ ବିପଦପୂର୍ଣ୍ଣ ହେଉଛି ଏବଂ ଯେ କୌଣସି ଅଘଟଣର ଆଶଙ୍କା ରହୁଛି । ଆଠଗଡ ପ୍ରଶାସନ ଓ ପୁଲିସ ପ୍ରଶାସନ ଏଥିପ୍ରତି ଦୃଷ୍ଟି ଦେଇ ତୋରଣ ଗୁଡିକୁ ହଟାଇବାକୁ ପଦକ୍ଷେପ ନେବା ଲାଗି ଦାବି ହେଉଛି।
Comments are closed.