ମୁଖୀଗୁଡା: ଜୟପାଟଣା ସହରକୁ ପାଇପଲାଇନ ଯୋଗେ ପାନୀୟ ଜଳଯୋଗାଣରେ ହୋଇଥିବା ଦୁର୍ନୀତି ବିରୋଧରେ ସୋମବାର ଗଣ ଧାରଣା କରାଯାଇଛି। ପାନୀୟ ଜଳଯୋଗାଣରେ ବ୍ୟାପକ ଅନିୟମିତତାର ଉଚ୍ଚସ୍ତରୀୟ ତଦନ୍ତ କରି ଦୁର୍ନୀତିଗ୍ରସ୍ତ କର୍ମଚାରୀଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ, ଜୟପାଟଣା ସହରକୁ ପାନୀୟ ଜଳ ଯୋଗାଣରେ ସମ୍ପୃକ୍ତ ଥିବା ସହକାରୀ ଯନ୍ତ୍ରୀ ନିହାର ମଲ୍ଲିକଙ୍କ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ତଥା ଅନ୍ୟତ୍ର ବଦଳି ଏବଂ ଜୟପାଟଣା ସହରର ପ୍ରତ୍ୟେକ ୱାର୍ଡକୁ ପାନୀୟ ଜଳ ଯୋଗାଣ ଦାବିରେ ଆଜି ଜୟପାଟଣାର ଜନସାଧାରଣ ଜୟପାଟଣା ବ୍ଲକ କାର୍ଯ୍ୟାଳୟ ସମ୍ଭୁଖରେ ଧାରଣାରେ ବସିଥିଲେ।
ଆଜି ଜୟପାଟଣାର ଶତାଧିକ ଜନସାଧାରଣ ଜୟପାଟଣା ଦୁର୍ଗା ମନ୍ଦିର ନିକଟରୁ ଏକ ଶୋଭାଯାତ୍ରାରେ ବାହାରି ବ୍ଲକ କାର୍ଯ୍ୟାଳୟ ସମ୍ମୁଖରେ ପହଞ୍ଚିବା ପରେ ଧାରଣାରେ ବସିଥିଲେ। ଜୟପାଟଣା ସହରକୁ ପାଇପ ଲାଇନ ଯୋଗେ ବିଶୁଦ୍ଧ ପାନୀୟ ଜଳଯୋଗାଣ ପାଇଁ ପ୍ରାୟ ୩ କୋଟି ଟଙ୍କା ଖର୍ଚ୍ଚ ହୋଇଥିବା ସତ୍ତ୍ବେ ଜୟପାଟଣା ସହରକୁ ପାନୀୟ ଜଳଯୋଗାଣ ହୋଇପାରିଲା ନାହିଁ। ଏହି କାମ ନିମ୍ନ ମାନର ଏବଂ ବ୍ୟାପକ ଦୁର୍ନୀତି ହୋଇଥିବା ସମ୍ପର୍କରେ ଜୟପାଟଣା ସରପଞ୍ଚ ୫ଟି ସଚିବ ଏବଂ କଳାହାଣ୍ଡି ଜିଲ୍ଲାପାଳଙ୍କୁ ଅଭିଯୋଗ କରିଥିଲେ, ହେଲେ କୌଣସି ସୁଫଳ ନମିଳିବାରୁ ଆଜି ୩ ଦଫା ନେଇ ଜୟପାଟଣା ସରପଞ୍ଚ ମୌସୁମୀ ଡଙ୍ଗରୀଙ୍କ ନେତୃତ୍ୱରେ ଗଣ ଧାରଣା ଦିଆଯାଇଥିଲା। ଏହି ଗଣ ଧାରଣାକୁ ଆମ ଆଦମୀ ପାର୍ଟି ଜୟପାଟଣା ବ୍ଲକର କର୍ମକର୍ତ୍ତାମାନେ ସମର୍ଥନ ଜଣାଇଥିଲେ। ଦାବି ପୂରଣ ନହେଲେ ଆଗାମୀ ଦିନରେ ବ୍ୟାପକ ଜନ ଆନ୍ଦୋଳନ କରାଯିବ ବୋଲି ଚେତାବନୀ ଦିଆଯାଇଛି।
