ହରଭଙ୍ଗା: ହରଭଙ୍ଗା ବ୍ଲକ ପୁରୁଣାକଟକ ଥାନା ଅନ୍ତର୍ଗତ ଚାରିଛକ-ଛତ୍ରଙ୍ଗ ପୂର୍ତ୍ତ ବିଭାଗ ରାସ୍ତାର ଲୋକାପଡ଼ା ନିକଟରେ ଗୁରୁବାର ମଧ୍ୟାହ୍ନ ସମୟରେ ଏକ ବାଇକ୍ ଦୁର୍ଘଟଣା ଘଟିଛି। ଏଥିରେ ସାନୁଜ ମଲ୍ଲିକ(୨୩) ନାମକ ଜଣେ ଯୁବକଙ୍କ ମୃତ୍ୟୁ ଘଟିଛି।
ସୂଚନା ଅନୁସାରେ, ଛତ୍ରଙ୍ଗ ପଟୁ ଚାରିଛକ ଆଡକୁ ବାଇକ୍ ଯୋଗେ ଫୁଲବାଣୀ ଅଂଚଳର କିଛି ଯୁବକ ଆସୁଥିବା ସମୟରେ ଏହି ଦୁର୍ଘଟଣା ଘଟିଥିଲା। ଏଥିରେ ସାନୁଜଙ୍କ ଘଟଣାସ୍ଥଳରେ ମୃତ୍ୟୁ ହେବା ଦେଖି ଅନ୍ୟ ସହଯୋଗୀମାନେ ଗାଡିଧରି ଘଟଣାସ୍ଥଳରୁ ଫେରାର ମାରିଥିଲେ। ଖବରପାଇ ଘଟଣାସ୍ଥଳରେ ହରଭଙ୍ଗା ଅଗ୍ନିଶମ ବାହିନୀ ପହଞ୍ଚି ମୃତଦେହ ଉଦ୍ଧାର କରି ପୁରୁଣାକଟକ ମେଡିକାଲ ପହଞ୍ଚାଇଥିଲେ। ମୃତ ଯୁବକଙ୍କ ଘର କନ୍ଧମାଳ ଜିଲ୍ଲା ବୋଲି ସୂଚନା ମିଳିଛି। ଖବରଲେଖା ପର୍ଯ୍ୟନ୍ତ ପୁରୁଣାକଟକ ମେଡିକାଲରେ ପରିବାର ଲୋକେ ପହଞ୍ଚି ପାରିନଥିବାରୁ ମୃତଦେହ ବ୍ୟବଛେଦ ହୋଇନଥିବା ଜଣାପଡ଼ିଛି। ପୁରୁଣାକଟକ ପୁଲିସ ଘଟଣାର ତଦନ୍ତ ଚଳାଇଛି।
