ନୂଆଦିଲ୍ଲୀ : ଟେଲିଭିଜନ୍ରେ ବିଭିନ୍ନ ପ୍ରସଙ୍ଗକୁ ନେଇ ବିତର୍କ ସମୟରେ ଏଥିରେ ଉପସ୍ଥିତ କେତେକ ବ୍ୟକ୍ତି ଘୃଣ୍ୟ ମନ୍ତବ୍ୟ ଦେଉଥିବାରୁ ବୁଧବାର ସୁପ୍ରିମକୋର୍ଟ ଏହାକୁ ନାପସନ୍ଦ କରିବା ସହ ଘୃଣ୍ୟ ମନ୍ତବ୍ୟ ରୋକିବା ବିତର୍କ ପରିଚାଳନା କରୁଥିବା ଉପସ୍ଥାପକଙ୍କ କର୍ତ୍ତବ୍ୟ ବୋଲି ମତ ଦେଇଛନ୍ତି।
ଦେଶର ବିଭିନ୍ନ ଗଣମାଧ୍ୟମରେ ଘୃଣ୍ୟ ମନ୍ତବ୍ୟ ପ୍ରଦାନକୁ ନେଇ ଅପ୍ରୀତିକର ପରିସ୍ଥିତି ସୃଷ୍ଟି ହେଉଥିବା ଏବଂ ଏହାକୁ ରୋକିବା ପାଇଁ କେନ୍ଦ୍ର ସରକାର ଉପଯୁକ୍ତ ପଦକ୍ଷେପ ଗ୍ରହଣ କରୁନଥିବା ଦର୍ଶାଇ ଆଇନଜୀବୀ ଅଶ୍ବିନୀ ଉପାଧ୍ୟୟଙ୍କ ତରଫରୁ ସୁପ୍ରିମକୋର୍ଟରେ ଏକ ମାମଲା ରୁଜୁ କରାଯାଇଛି। ଘୃଣ୍ୟ ମନ୍ତବ୍ୟ ପ୍ରଦାନକାରୀଙ୍କୁ ରୋକିବାକୁ କେନ୍ଦ୍ର ସରକାର ପଦକ୍ଷେପ ଗ୍ରହଣ କରିବାକୁ ଆବେଦନରେ ନିବେଦନ କରାଯାଇଛି। ଏହି ମାମଲାର ଶୁଣାଣି କରି ଜଷ୍ଟିସ୍ କେଏମ ଜୋସେଫ୍ ଓ ହୃଷୀକେଶ ରାୟଙ୍କ ପୀଠ ଦର୍ଶାଇଥିଲେ ଟେଲିଭିଜନ ତଥା ଅନ୍ୟାନ୍ୟ ଗଣମାଧ୍ୟମରେ ଘୃଣ୍ୟ ମନ୍ତବ୍ୟ ପ୍ରଦାନ ଯୋଗୁଁ ଦେଶର ବିଭିନ୍ନ ସ୍ଥାନରେ ଅପ୍ରୀତିକର ପରିସ୍ଥିତି ସୃଷ୍ଟି ହେଉଥିବା ବେଳେ ସରକାର ମୂକ ଦର୍ଶକ ସାଜିଛନ୍ତି ଯାହାକି ଗ୍ରହଣୀୟ ନୁହେଁ। ଟେଲିଭିଜନ୍ରେ କୌଣସିି ପ୍ରସଙ୍ଗରେ ବିତର୍କ କାର୍ଯ୍ୟକ୍ରମ ଚାଲିଥିବା ବେଳେ ଯଦି କୌଣସି ନିମନ୍ତ୍ରିତ ବ୍ୟକ୍ତି ଘୃଣ୍ୟ ମନ୍ତବ୍ୟ ଦିଅନ୍ତି ତେବେ ତାହାକୁ ରୋକିବା କାର୍ଯ୍ୟକ୍ରମ ପରିଚାଳନା କରୁଥିବା ଉପସ୍ଥାପକଙ୍କ କର୍ତ୍ତବ୍ୟ। ଏପରି ସ୍ପର୍ଶକାତର ପ୍ରସଙ୍ଗରେ ସରକାର ମୂକ ଦର୍ଶକ ସାଜିବା ଦେଶକୁ ବିପଦ ମୁହଁକୁ ଠେଲି ଦେଉଛି। ଟେଲିଭିଜନରେ ବିତର୍କ କାର୍ଯ୍ୟକ୍ରମ ପ୍ରସାରଣ ସମୟରେ ଅନେକ ସମୟରେ ଘୃଣ୍ୟ ମନ୍ତବ୍ୟ ପ୍ରଦାନ କରାଯାଉଥିବା ଦେଖିବାକୁ ମିଳୁଥିବାରୁ ଏପରି କାର୍ଯ୍ୟକ୍ରମ ପରିଚାଳନା ନିମନ୍ତେ ସରକାର ଏକ ମାର୍ଗଦର୍ଶିକା ପ୍ରସ୍ତୁତ କରିବାର ଆବଶ୍ୟକତା ରହିଛି। ସେହିପରି ଉପସ୍ଥାପକ ଅନେକ କ୍ଷେତ୍ରରେ ବିତର୍କରେ ଭାଗ ନେଉଥିବା ଲୋକଙ୍କୁ ସେମାନଙ୍କ ମତ ରଖିବାକୁ ସୁଯୋଗ ଦେଉନଥିବା ଦୁର୍ଭାଗ୍ୟଜନକ। ଉପସ୍ଥାପକ କୌଣସି ବ୍ୟକ୍ତିଙ୍କ ମତକୁ ଚାପି ଦେଇ ପାରିବେ ନାହିଁ ବୋଲି ପୀଠ ଦର୍ଶାଇଥିଲେ।
ଏ ସମ୍ପର୍କରେ ଜବାବ ରଖି ଅତିରିକ୍ତ ସଲିସିଟର ଜେନେରାଲ୍ ଏମ୍.କେ ନଟରାଜ କହିଥିଲେ ଘୃଣ୍ୟ ମନ୍ତବ୍ୟ ପ୍ରଦାନକାରୀଙ୍କ ବିରୋଧରେ ୧୪ଟି ରାଜ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ପୀଠ କହିଥିଲେ ପ୍ରେସ୍ ସ୍ବାଧୀନତା ଗୁରୁତ୍ବପୂର୍ଣ୍ଣ, ତେବେ ଏହା ଯେପରି ସୀମୀ ଉଲ୍ଲଙ୍ଘନ ନ କରେ ସେଥିପ୍ରତି ଦୃଷ୍ଟି ଦିଆଯିବାର ଆବଶ୍ୟକତା ରହିଛି। ସୂଚନାଥାଉ କି ଗତ ଜୁଲାଇ ୨୧ରେ ଘୃଣ୍ୟ ମନ୍ତବ୍ୟ ଏବଂ ଏହାକୁ ନେଇ ସୃଷ୍ଟ ହିଂସାକୁ ରୋକିବାକୁ ରାଜ୍ୟ ସରକାରମାନେ କ’ଣ ପଦକ୍ଷେପ ଗ୍ରହଣ କରିଛନ୍ତି ସେ ସଂପର୍କରେ ଉତ୍ତର ରଖିବାକୁ କେନ୍ଦ୍ର ଗୃହ ସଚିବଙ୍କୁ ସୁପ୍ରିମକୋର୍ଟଙ୍କ ପୀଠ ନିର୍ଦେଶ ଦେଇଥିଲେ।
Comments are closed.